Үөрэхтээhин эйгэтигэр "Сыл учуутала" - биир улахан суолталаах күрэх буолар. Историяны эргиллэн көрдөххө, дойдуга аан бастаан 1990 сыллаахха "Учитель года СССР" ыытыллыбыта. Бу кэмтэн чулууттан чулуу, бастыҥтан бастыҥ кыайыылаахтар "Хурустаал пеликаны" илиилэригэр туппуттара. Ол кэмтэн ыла бириэмэ ирдэбиллэринэн күрэх түhүмэҕэ элбээн, чопчу учуутал таhымын көрдөрөр баай историялаах тэрээhиҥҥэ кубулуйда.
Бу сыл олунньу 18 күнүгэр П.А.Ойуунускай аатынан Чөркөөх орто оскуолатыгар улуустааҕы "Сыл учуутала" күрэх буолан ааста. Уопсайа улуус 14 оскуолатыттан дэгиттэр талааннаах учууталлар кэлэн кыттыыны ыллылар. Учууталлар хас да түhүмэҕинэн: бэйэтин предметигэр уруок ыытыы, туттар технологиятынан маастар-кылаас көрдөрүүтэ, үөрэнээччилэри, төрөппүттэри кытта кэпсэтии, аhаҕас дискуссия түhүмэххэ улуус баhылыга М.М.Соровы кытта санаа атастастылар. Манна даҕатан бэлиэтээтэххэ, саҥа үйэҕэ үөрэх суолтата өссө үрдээтэ, ис хоhооно уларыйда, дириҥээтэ. Үөрэхтээhин эйгэтигэр бара турар уларыйыыны олоххо киллэрээччи учуутал буолар. Кини билиитин, сатабылын таhымыттан үөрэх хаачыстыбата быhаччы тутулуктаах. Онон учуутал идэтин таhымын үрдэтии куруук да болҕомто киинигэр турар...
Эмма КАШКИНА.
