Ааспыт нэдиэлэҕэ улууспутугар "Сахафильм» национальнай киинэ компаниятын үлэhиттэрэ Н.Е.Мординов-Амма Аччыгыйа «Сааскы кэм» романыгар олоҕурар художественнай киинэ барыллаан уhуллар миэстэлэринэн сырыттылар.
Бу улууспутугар «Сахафильм» кыттыылаах улахан бастакы бырайыак. Киинэ муус устартан саҕалаан уhуллара күүтүллэр. Киинэ режиссерунан Саха сирин биир тарбахха баттыыр, «Орто дойду» уус-уран этнографическай киинэни уhулбут Алексей Романов буолар.
«Сааскы кэм» роман киэҥ-куоҥ эпическэй айымньы буолар. Онон режиссер Алексей Романов сериал кур-
дук уhуллуон сөп диэн этэр. Салгыы кини: «Оҕо эрдэхпиттэн «Сааскы кэм» роман сүрэхпэр-быарбар чугас, хаhан эрэ бу айымньыны киэҥ эйгэҕэ киинэ гынан көрдөрөр санаалаах этим. Бастатан туран, бэйэбэр бу саха олоҕун дьаhаҕын көрдөрөр роман-эпопеянан тугу көрдөрөбүн диэн толкуй турбута. Амма Аччыгыйа романыттан бастакы чааhын ордорор этэ. Манна оҕо хараҕынан аан дойду айыллыыта, төрт омук сиэрэ-туома, үгэhэ барыта көстөр. Онон бу Микиитэ оҕо сааhын кэрчик кэмин ылаары гынабын. Онон киинэ кылаабынай геройунан 9 - 10 саастаах оҕо буолуоҕа. Сүрүн сыалбыт-сорукпут былыр саха оҕото өйө-санаата ситиитэ-хотуута, санаата-оноото уларыйан тыыллан-хабыллан тахсарын көрдөрүү буолар.Онон революция иннинээҕи саха олоҕун көрдөрүөхпүт. Манна туhаныллар реквизиттэрбит балаҕан, күрүө-хаhаа, сэп-сэбиргэл барыта ол кэмнээҕи буолуон наада. Билигин бэйэм өттүбүттэн литературнай сценарийа суруллан бүтүөҕэ, онтон режиссерскай сценарий
оҥоhуллуоҕа. Онно сирэ-уота, бириэмэтэ, дьыл кэмэ, хараҥа, сырдык кэмнэрэ суруллаллар. Сценарий нууччалыыта «Детство, которое мы не знали» диэн ааттаах.
Биhиги бу кэлэ сылдьан Харбалаахха баран суруйааччы музейын, төрөөбүт балаҕанын көрдүбүт. Биллэн туран кэм кэрдии сиэринэн суруйааччы төрөөбүт балаҕана саҥардыллыбыт, өрөмүөннэммит, киинэҕэ кыра да деталь сөп түбэспэтэ улаханнык охсор.
- Улуус барылыга М.М.Соров «Сахафильмы» кытта дуогабар түhэрсиэҕиттэн ыла сахалыы таҥаскытын бэлэмнэниҥ, чугас уурунуҥ диэбитэ, киинэҕэ улууспут дьоно хабыллыахтаах, көстүөхтээх
диэн санааттан. Онон кылаабынай геройбут оҕо буолар, онтон атын оруолларга кимнээх кыттыахтарай?...
С.ХАЛГАЕВА.
