Ааспыт нэдиэлэ бүтэһик күнүгэр Тааттатааҕы народнай театр уораҕайыгар улууспутугар – Үөрэҕирии, республикаҕа – Тупсаҕайдык туттан олоруу, дойдуга – Киинэ сылларын аһыы үөрүүлээх сиэрэ-туома ыытылынна. Бу күн икки мэндиэмэнинэн толору дьон-сэргэ мустан сэргэх тэрээһини көрдүлэр-иһиттилэр, кытыннылар.
Ол курдук, иккис мэндиэ-мэҥҥэ улууска Үөрэҕирии сылын көрдөрөр «Таатта иитэр-үөрэтэр эйгэтин» кластерын биир бырайыага «5 китов образования» тэрээһин кһөстүү оргуйда. Киһи сүргэтин көтөҕөн, сааланы биир гына Тааттатааҕы музыкальнай оскуола иитээччилэрэ музыкальнай инструменнарынан оонньоон көрөөччүнү бэйэлэригэр тартылар. Дьэ, маннык хас биирдии киһи кэрэҕэ, сырдыкка тардыһан аттыгар баар тулалыыр дьонун кытыарыахтаах. Бу күн театр төгүрүк саалатыгар улууспут эбии үөрэхтээһинин эйгэтэ ыытар үлэтин барытын эргиччи көрөн, этэргэ дылы тутан-хабан, барытыгар холонон көрөр түгэни тосхотто. Улуустааҕы үөрэх управлениетын салайааччытын солб. Мира Николаевна Луковцева тэрээһин туһунан бу курдук сырдатта: «Бу үүммүт сылга улууспутугар Үөрэҕирии уонна эбии үөрэхтээһин сылынан биллэрилиннэ. Онон бу бүгүн ыытылла турар тэрээһин манна ананна. Биһиги улууспутугар «Таатта иитэр-үөрэтэр эйгэтэ» кластер уон бырайыагынан үлэлиир. Ол онтон бүгүн «5 китов образования» бырайыакка: «Тыл», «Бары уруһуйдуубут», «Музыка - барыбытыгар», «Саахымат» бырайыактары көрдөрдүбүт. Бу эйгэ барыта холбоон оҕо, киһи дьоҕурун, өйүн-санаатын сайыннарар. Манна бүгүн улууспут оскуолалара, эбии үөрэхтээһин, оҕо уһуйааннара, общественнай түмсүүлэр кытыннылар. Бу маннык дьарык хас биирдии тэрилтэҕэ киириэн баҕарабын», -диэтэ. Салгыы элбэх киһи тоҕуоруспут остуолугар уһуйааччы В.В.Тистяхов талаҕынан корзина оҥорбутун сэҥээрээччилэр быыстарыгар киирэн кэпсэтэбин. Маныаха улуустааҕы Оҕо айымньытын «Уран уус» куруһуогун учуутала В.В.Тистяхов: «Быйыл Эбии үөрэхтээһин сылынан үлэбитигэр үчүгэйи эрэ күүтэбин. Бу сыл чэрчитинэн үлэлиир дьиэбитин-уоппутун кэҥэтиэхтэрэ, техническэй базабыт сайдыа, хаҥыа диэн эрэнэбин. Мин куруһуокпар 53 оҕо сылдьар. Кинилэргэ Тааттабыт талаҕынан, маһынан араас тээбириннэри оҥорорго, маска кыһарга үөрэтэбин. Билиҥҥи үйэҕэ эбии үөрэхтээһин үөрэҕэ олоххо-дьаһахха олус наадалаах. Оҕолор күнү-күннүктээн телевизорга, компьютерга хатанан олороллоруттан тэйитэбит. Манна кэлэн оҕо илиинэн тутан-хабан үөрэнэрэ, эбии дьарыкка олох үөрүйэхтэрин билэрэ, үөрэтэрэ хайаан да наада», - диэн үлэтин туһунан лоп-бааччы быһаарда. «Сатабыл» оҕо айымньытын дьиэтин директора А.В.Портнягина тэрээһин туһунан бу курдук санаатын үллэһиннэ: «Быйыл СР Үөрэҕин министерствота эбии үөрэхтээһин сылын биллэрдэ. Онон бу хайысхаҕа үлэлии сылдьар дьон үлэбитигэр болҕомто ууруллубутунан үөрдүбүт. Үлэбит барыта оҕо туһугар туһуланар, үүнэр көлүөнэбитин олох сатабылларыгар уһуйарга сөптөөх усулуобуйа тэриллиэ диэн күүтэбин. Чуолаан быраап-нормативнай өттүнэн бөҕөргүө диэн эрэнэбин, тоҕо диэтэххэ туох барыта сокуонунан салаллар. Материальнай-техническэй базабытын хаҥатыыга үлэ барыаҕа. Кадр өттүнэн эбии идэлэри үрдэтэр курстар...
С.ХАЛГАЕВА.
