Кэлин сылларга Арассыыйаҕа даҕаны, Саха сиригэр даҕаны үлэҕэ дэҥ-оһол тахсыыта аччаабат. Ол иһин үлэҕэ оһоллонууну (травматизмы) аҕыйатар сыалтан, сыл аайы үлэҕэ сэрэхтээх буолуу ыйдара ыытыллаллар. Биһиги тэрилтэбит, «СӨ ОДьКХ» ГУТ филиала буолар. Тэрилтэ 14 учаастагар 400-тэн тахса үлэһит 36 (ааспыт үйэҕэ 64-кэ тиийэ сылдьыбыта) хочуолунайы, 84 км ититэр ситими үлэлэтэр, көрөр-истэр. Аныгы кэми кытта тэҥҥэ хардыылаан, ОДьКХ ситимигэр күүстээх уларыйыылар бараллар. Ол курдук оройуон киинигэр эрэ буолбакка, учаастактарга эмиэ улахан кыамталаах квартальнай хочуолунайдар үлэҕэ кииртэлээн эрэллэр. Саҥа хочуолунайдар үксүлэрэ толору механизациялаахтар, онон илии үлэтин лаппа аччаттылар. Ол оннугар үлэҕэ сэрэхтээх буолуу боппуруоһа күүскэ турар буолла.
Үөһээҥҥи салалтабыт «СӨ ОДьКХ» ГУТ уонна «Таатта улууһа» муниципальнай оройуон дьаһалтата бу сыл муус устар ыйы толору - үлэҕэ сэрэхтээх буолуу ыйынан биллэрбиттэрэ. Олорго олоҕуран тэрилтэбит иһинэн дьаһал тахсан, ыйдааҕы үлэ былаана оҥоһуллубута. Дириэктэрбит Дмитрий Павлов тэрилтэ испэсэлиистэрин, маастардарын мунньан, үлэҕэ сэрэхтээх буолуу ыйын аспыта, туох үлэлэр барыахтаахтарын билиһиннэрбитэ.
Муус устар 15 күнүгэр учаастак маастардарыгар үлэҕэ сэрэхтээх буолууга семинар тэрилиннэ. Дириэктэр Дмитрий Павлов, үлэҕэ сэрэхтээх буолуу инженерэ Анатолий Мурунов, производственнай-техническэй отдел салайааччыта Пантелеймон Сенькин, кылаабынай энергетик Семен Табунанов анал тиэмэлэринэн билиһиннэрии, үөрэх ыыттылар. Тэрилтэ медүлэһитэ Анна Никифорова быһылааҥҥа түбэспит киһиэхэ бастакы көмөнү хайдах оҥорор туһунан, наадалаах эмтэри көрдөрө-көрдөрө кэпсээбитин бары сэҥээрэн иһиттилэр, барытын бэлиэтэннилэр. Бу семинар кэнниттэн маастардар бэйэлэрин үлэһиттэрин мунньан, маннык үөрэҕи ыытыахтаахтар. Киһи бэйэтэ барытын билэр курдук саныыр да, наадалаахха билбэтиҥ элбэх буолааччы. Этэргэ дылы таҥара сэрэҕи таптыыр дииллэр, онон билиигин сотору-сотору тургутан, саҥардан биэрбитиҥ ордук.
Тэрилтэ иһинэн кылаабынай инженер Владимир Колесов салайар, үлэҕэ сэрэхтээх буолуу анал кэмииссийэтэ тэриллэн үлэлиир. Кэмииссийэ чилиэннэрэ бу күннэргэ суолу былдьаһа учаастак хочуолунайдарын кэрийэллэр. Үлэһиттэр олорор-сынньанар хосторун, санитарнай туруктарын, инструкциялары, анал сурунааллары хайдах толорон иһэллэрин көрө-истэ, билсэ сылдьаллар. Ол кэнниттэн барытын холбоон-түмэн, туох үлэ эбии барыахтааҕар этиилэр тэрилтэ былааныгар киириэхтэрэ.
Үлэҕэ сэрэхтээх буолуу ыйа салҕанар, үлэ күөстүү оргуйар.
Анатолий Мурунов, тэрилтэ үлэҕэ
сэрэхтээх буолууга инженерэ.
