Кыайыы күнэ
Сыл ахсын Кыайыы күнэ-суолтата улаатан иһэр. Биһиги ытык дьоммут ветераннар кэскиллээх олоҕу түстэһэн, Улуу Кыайыыны аҕалсыбыттара. Кинилэр олорбут олохторо көлүөнэттэн көлүөнэҕэ холобур буолар. Биһиэхэ Харбалаахха кыайыы күнүгэр аналлаах тэрээһин нэһилиэнньэ олохтоохторун парадтарынан саҕҕаланна. Эҕэрдэ тылы дьаһалтабыт баһылыга А.И.Кулачиков эттэ. Тэрилтэ салайааччылара тыыл, үлэ ветераннарыгар эҕэрдэ этэн туран подароктары туттардылар. Эҕэрдэ концерт кэнниттэн тэрилтэлэринэн эстафета буолла. Ветераннарбытыгар, сэрии тулаайахтарыгар сандалы остуол тэриллэн сынньаннылар. Онтон киэһэ 9 чаастан кыайыы болуоссатыгар элбэх киһи кыайыыны уһансыбыттарга анаан, кэриэстээн кэлэн чүмэчи уурдубут. Кыайыы 71 сылыгар аналлаах салют, салгын шариктарын көтүтүү тэрилиннэ.
Ґлэ бырааґынньыга
«Кэскил» оҕо уһуйаана маай бырааһынньыгар киэҥ программалаах концерт көрдөрдө. Үөрүүлээх дьоро киэһэлэрин Саха народнай суруйааччыта Амма Аччыгыйа 110 сааһыгар анаабыттар. Тэрээһин «Бриллиантовые нотки», өрөспүүбүлүкэтээҕи «Дэгэрэҥ», улуустааҕы «Чугдаарар чуораан» дипломаннара, лауреаттара орто бөлөх иитиллээчитэ Айсана Федорова Амма Аччыгыйа тылыгар «Учууталбар» ырыатынан саҕаланна. Саамай кыракый иитиллээччилэр «Чоппуускалар» үҥкүүнү толорон, көрөөччүлэр биһирэбиллэрин ыллылар. Иитээччилэрэ Оксана Андреева оҕолорун кытары тахсан үҥкүүлээбитэ олус сэргэх буолла. Бииртэн биир араас таһымнаах ырыа ылланна, үҥкүү үҥкүүлэннэ. Ордук Даяна Халыева, Айсана Федорова, Коля Канаев сололара, бары группалар бөлөҕүнэн ырыалара, кыра бөлөх оҕолоро төрөппүттэрин кытары үҥкүү көрдөрбүттэрэ, орто бөлөх оҕолоро "Ретро" муоданы көрдөрбүттэрэ, чабырҕахтар «Матросскай», «Восточнай», «Кулунчук» үҥкүүлэр төрөппүттэр да, көрөөччүлэр да биһирэбиллэрин ыллылар. Оҕолорбут мантан да атын көрдөрбүт нүөмэрдэриттэн, үлэһиттэр иитиллээччилэрин араас көрүҥүнэн уһуйаллара көстөр. Маны таһынан үлэһиттэр бары да талааннара сүрдээх эбит. Ол курдук индийскэй үҥкүүнү толорбуттара, Яков Аввакумов В.Туманов сололара, көрдөөх детсад оҕолоро буолан көрдөрбүт сценкалара, кыргыттар ансаамбыллара көхтөөх ытыс таһыныытынан доҕуһуолланна. Биһиги «Кэскил» уһуйааммыт улууспутугар үчүгэй үлэлээҕинэн биллэр. Салайар дьоҕурдаах Христина Сергеевна Кривошапкина коллектива саамай инники эрэллэрбитин, кырачааннарбытын кэрэ эйгэтигэр уһуйан, талааннарын чочуйан элбэххэ үөрэтиэ диэн эрэнэбит.
С.БАШАРИНА.
