Соторутааҕыта улууспутугар Литература сылын, талааннаах биир дойдулаахпыт, эдэр суруйааччы Гаврил Андросовтыы эттэххэ, туомтуу тардар үтүө тэрээhин улуустааҕы театр киэҥ уораҕайыгар ыытылынна. Бу күн улууспут айар куттаах дьоно-сэргэтэ мустан хоhоон киэҥ түhүлгэтин олохтоон, саҥа тахсыбыт «Уран тыл оhуордаах хонуута» сериянан тахсыбыт 25 автор кинигэтин сүрэхтэниитигэр кытыннылар.
2015 сыл Россия үрдүнэн Литература сылынан биллэриллибитэ. Улууспутугар бу бэлиэ сылга араас элбэх тэрээриннэр ыытылыннылар. Ол курдук, Литература сыла улууспутугар эдэр суруйааччылары кытта көрсүhүүттэн саҕаламмыта. Ааҕааччылары кытта иhирэх кэпсэтии олус истиҥник ааспыта. Бу манна киин библиотека араас хабааннаах үлэни ыытта: саҥа кинигэлэр биhирэмнэрин, суруйааччылары, суруналыыстары кытта көрсүhүүнү, ийэ тыл уонна олоҥхо күнүгэр аналлаах интерактивнай викториналары, сахалыы диктант суруйуутун, улуустааҕы уус-уран ааҕыы күрэҕин, хаhыатынан литературнай викторинаны уонна да атыттары тэрийэн, этэргэ дылы үлэлэрэ-хамнастара таҕыста. Оттон бу ыытыллыбыт тэрээhин сылы түмүктээн, сыллааҕы айар үлэни – улууспут айар куттаахтарын кинигэлэрин күн сирин көрөн, биhиримҥэ муста.
Диктор, улуустааҕы киин библиотека библиотекара С.С.Игнатьева чуор куолаhынан мустубут дьону айхаллаан: «Талааннаах дьоннордоох Таатта улууhа, дьэ, бу дьиҥнээх саха литературатын биhигэ буолбут ытык-мааны сир. Кинилэр уус тылларыгар умсаахтаан, сүөгэй тылларыгар сөтүөлээн. Ийэ тылларын эттэригэр-хааннарыгар иҥэринэн улааппыттара саха литературатын төрүттээччилэр, саха народнай суруйааччылара, суруйааччылар сойуустарын чилиэннэрэ уонна олохтоох автордар. Бүгүн биhиги Таатта улууhун айар куттаах, талааннаах дьонун билиhиннэрэ, кинилэр кинигэлэрэ күн сирин көрбүт үөрүүлээх түгэнин бэлиэтии муhуннубут», - диэн этэн туран, тылы бастакынан улуус баhылыгын солб. И.А.Сивцеваҕа биэрэр: «Бүгүн манна саҥа хоhоон хомуурунньуктара тахсыбыт үтүө-маaны күнүн бэлиэтээри муhуннубут. Мин ханна да сылдьарым тухары Тааттаҕа общественнай түмсүүлэр баалларын кэпсиибин, аҥардас биир тэрээhиҥҥэ 60-ча киhи мустар диэтэхпинэ, улаханнык соhуйаллар, итэҕэйбэттэр. Бу саҥа кинигэлэри тутан туран, бүгүн саҕаламмыт саҕалааhыннарбыт дьолбут диэн сыаналыыбын. Бу кинигэлэр кэнэҕэски ыччаттарбытыгар - оҕолорбутугар хаалар, кинилэргэ туттарылларыттан. Эhигини барыгытын саҥа тахсыбыт кинигэлэр сүрэхтэниилэринэн өссө төгүл эҕэрдэлиибин. Маннык сериянан салгыы үлэлэhиэххэ, таhаарыахха наада, этэргэ дылы «суруллубут - суоруллубат», - диэтэ.
Бу ааспыт сылга киин библиотека «Литературнай туризм по памятным местам Таатты» диэн бырайыага Саха республикатын Ил Дарханын Е.А.Борисов Гранын ылбыта. 2015 сылга республика±а биир бастакынан Таатта литературнай картата оҥоhуллубута. Бу литературнай картаны киин библиотека информационнай-библиографическай отделын сэбиэдиссэйэ Е.И.Шестакова автордаах тахсыбыта. Литературнай карта туhунан Е.И.Шестакова: «Бу литературнай картаны оҥоруу сүрүн бырайыага - национальнай библиотека буолар. Маннык карта Хаҥаласка уонна биhиэхэ баар. Билигин бу картаны тутан олорон интернет дириҥ ситимин нөҥүө көрүөххэ сөп. Эбии матырыйаал таҕыстаҕына бу карта саҥардыллан, эбиллэн, чочуллан иhэр», - диэн сырдатта.
Улууспутугар 11 литературнай түмсүү баар. Кинилэри «Уран тыл» улуустааҕы литературнай түмсүү салайан, түмэн кэллэ. Аспыт сыл бүтэhик ыйдарыттан «Таатта» хаhыат редактора А.К.Посельская бырайыагынан «Уран тыл оhуордаах хонуута» сериянан барыта 25 кинигэ олохтоох хаhыаппытыгар бэчээттэнэн таҕыста. Бу хомуурунньугу киин библиотека библиотекара С.С.Игнатьева хомуйан оҥордо, О.П.Андросова редакциялаата, тас өттүн П.С.Доргуев киэргэтэн, компьютернай версткатын М.Г.Неустроева, С.Н.Данилова, В.И.Данилов оҥордулар...
С.ХАЛГАЕВА.
