Улуу убайбыт Былатыан Ойуунускай 100 сыллаах үбүлүөйэ бэлиэтэммитэ хайы үйэ 23 сыл буола охсубут. Былыргы муударай өбүгэлэрбит: “Этэҥҥэ олордоххо сыл хонук” диэн бэргэн этиилэрин санатар.
Былатыан Алексеевич төрөөбүтэ 125 сыллаах үбүлүөйүн республика таһымыгар бэлиэтииргэ улуус салалтатын көрдөһүүтүн Ил Дархан ылынан үбү-аһы тута сылдьар киһини, Правительство председателин Г.И. Данчикованы, комиссияны салайарга сорудахтаабыта Таатталар салайааччылара М.М.Соров улахан ситиһиитэ диэн сыаналыахтаахпыт.
Үбүлүөйү үрдүк таһымҥа атаарыыга улуус дьонуттан-сэргэтиттэн киирэр этиилэри түмэн республика комиссиятыгар туруорсуу быһыытынан “Таатта” хаһыат (кылаабынай редактор Посельская А.К.) олохтообут рубриката улууска демократия сайдыытыгар, бэйэни салайыныы салгыы олоххо киириитигэр боччумнаах дьоһун хардыы оҥоһуллубутун бэлиэтиэх тустаахпыт.
Ити үчүгэй түгэннэри ыйан туран улууска үлэлээбит уонна Тааттабыт сирэ салгыы сайдарын туһугар ис сүрэхпиттэн кыһаллар, баҕарар киһи буолан тураммын республика комиссия дьүүлүгэр маннык этиилэри киллэрэбин.
Бастатан туран, Ил Дархан ыйааҕынан быйылгы сыл республика үрдүнэн дьон олорор сирдэрин тупсаран оҥоруу сыла биллэриллибитэ. Бу ыйаахха олоҕуран турба устун дьон иһэригэр аналлаах сылаас уонна тымныы ууну, ону таһынан билигин туттулла турар кирдээх уулары мунньар септиктэр оннуларыгар канализационнай ситими бырайыактааһыны 2017 с. былааҥҥа киллэрэн саҕалааһыны туруорсуу олоххо киирдэҕинэ бу бэйэтэ кыра социальнай өрөбөлүүссүйэҕэ тэҥнээх кыайыы буолуох этэ. Бу туруорсуу олоххо киирдэҕинэ Ытык Күөл бары тэрилтэлэрэ, кэтэх ыаллара помоя айдааныттан быыһаныах этилэр. Септиктэр тэстиилэриттэн, тоҥууларыттан сиргэ тохтубут кирдээх ууга үөскүүр үөн-көйүүр нэһилиэнньэ доруобуйатыгар буортуну оҥоруута төрдүттэн туоратыллыбытын таһынан сэлиэнньэ тас көстүүтэ, санитарнай туруга тупсара саарбаҕа суох.
Иккиһинэн, үлэлии турар улуус киинин ууга барыыттан өрүһүйэр программаҕа эбии “Кылгас үрүйэтин” тардыытыгар олорор ыаллар сыллата ууга барыыларыттан өрүһүйэр инниттэн анал лотоктарынан ууну аһарар каналы правительство 2017с. былааныгар киллэрэн оҥоруу улахан көдьүүстээх дьаһал буолуох этэ.
Үсүһүнэн, улуу убайбыт саха норуотун өйө-санаата уһуктуутугар хаһыат, араадьыйа уһулуччу улахан оруоллаахтарын тоһоҕолоон бэлиэтиирэ.
Онон сибээстээн хаһыат, араадьыйа, олохтоох телевидение, бэчээттиир тэрилтэ (олохтоох типографическай киин) коллективтарыгар сөптөөх үлэлиир усулуобуйаны тэрийэр сыалтан аналлаах дьиэтин 2018 сылы көрсө үлэҕэ киллэрии П.А. Ойуунускай дойдутун дьонугар боччумнаах улахан бэлэх быһыытынан сыаналаныаҕа.
Төрдүһүнэн, өрөбөлүүссүйэ иннинэ тутуллубут эргэ, списаннай дьиэҕэ үлэлии олорор кыра саастаах оҕолору сэллик ыарыыттан эмтиир Чөркөөхтөөҕү диспансер оннугар түргэнник хомуллар модульнай эмп тэрилтэтин 2017 с. тутан үлэҕэ киллэрии П.А. Ойуунускай киинэ түспүт нэһилиэгэр бар дьоммутунан умнуллубат бэлэх быһыытынан сыаналаныаҕа.
Убаастабыллаах Таатта дьоно! Күн – дьыл түннүгүнэн чыычаах көтөн ааһарын курдук түргэнник элэҥнээн ааһар кэмигэр Улуу Ойуунускай төрөөбүтэ 125 сыллаах үбүлүөйүн уруккаттан буоларын курдук үрдүк таһымҥа атаараргытыгар бүк эрэнэн туран нэһилиэнньэ өйүгэр-санаатыгар уһун сылларга сөҥөн хаалан туһаныахтаах тутуу боппуруостарын сиэрдээх туруорсууларгытын быһаарарга бэриллибит историческай түгэн үөскээбитин мүччү туппаккытыгар баҕарабын.
Г. АРТЕМЬЕВ,
Саха АССР норуотун хаһаайыстыбатын үтүөлээх үлэһитэ,
Таатта уонна Мэҥэ Хаҥалас улуустаарын бочуоттаах Гражданина,
Саха АССР XII, Ил-Түмэн I, III, IY ыҥырыылаах норуот дьокутаата.
