Кэлиҥҥи сылларга ыччаттары рабочай хайысхалаах идэлэргэ үөрэтиигэ болҕомто ууруллан, элбэх киһи орто анал үөрэх тэрилтэлэригэр үөрэниилэрэ элбээтэ. Онуоха Ытык Күөл 2№-дээх орто оскуолатыгар пожарник, электрик уонна сварщик идэлэригэр 10-11 кылаастар үөрэнээччилэригэр икки сыллаах үөрэҕи ыытыы туһунан 2016 сыл муус устарга сөбүлэҥ улуус баһылыгын кытта түһэрсиллибитэ. Сөбүлэҥ олоххо киирэн, алтынньыттан Ытык Күөл икки орто оскуолаларын уонна лицей 17 үөрэнээччилэрэ алтынньы ыйтан үөрэниилэрэ саҕаламмыта.
Тохсунньу 18 күнүгэр Чурапчытааҕы колледж уонна тыа сирин оскуолата идэлээх дьону иитиигэ-үөрэтиигэ ситимнээх үлэни ыытыыларыгар Ытык Күөл 2№-дээх орто оскуолатыгар семинар ыытылынна. Семинары оскуола директора Д.В.Сергеев уонна колледж директора Е.В.Попов ыыттылар. Семинар саҕаланыытыгар сыл бастакы аҥарыгар бу оскуолаҕа үөрэтии хайдах ыытыллан иһэрин иһитиннэрдэ. Ханнык ыарахаттар, өссө туох ситэ тэриллибэккэ хаалбыт өрүттэр баалларын туһунан икки өттүттэн сүбэлэһии быһыытынан кэпсэттилэр. Салгыы колледж директорын үөрэх чааһыгар солбуйааччы А.Г.Орлова уонна методист М.В.Никитина үөрэтиигэ туттуллубут докумуоннары, сурунааллары, биэдэмэстэри көрөн, үөрэтэн баран инникитин бу өттүгэр бары ирдэбиллэри күүскэ тутуһарга, үөрэнэр кинигэлэри, босуобуйалары төһө баарынан, тиийбэт өттүн стандартка сөп түбэһэринэн электроннай варианнарын эмиэ туһанарга эттилэр, сүбэлэри биэрдилэр. Оскуолатааҕы салааҕа саҥа саҕалааһын буоларынан итэҕэстэр, көтүтүүлэр да баалларын бэлиэтээн эттилэр. Ол эрээри бу барыта дьаныһан үлэлээтэххэ туоратылларын, кулун тутар ыйга диэри болдьохтоон докумуоннары ситэрэргэ, колледж салалтатыгар туттарарга сорудахтаатылар. Билигин үөрэнэн саҕалаабыт оҕолор оскуоланы бүтэриилэригэр үлэ быраап ылар докумуоннарыгар икки хайысхаҕа идэлээх тахсыахтаахтар. Пожарнайы бүтэрээччилэр эбии водитель идэлэниэхтээхтэр, оттон газоэлектросварщиктар сантехническэй идэни эбии ылыахтаахтар. Электромонтер үөрэҕэр үөрэнээччилэр эбии слесарь идэлэниэхтэрин сөп. Маныаха хас биирдии курсант бу үөрэҕэр оскуолатын кытта тэҥ эппиэтинэстээхтик үөрэнэргэ дьулуһуохтаах. Бу өттүнэн төрөппүттэр уонна кылаас салайааччылара, социальнай педагогтар оҕолор үөрэҕи көтүппэт буолалларыгар, кыһамньылаахтык үөрэнэллэригэр болҕомтолорун күүһүрдэллэрэ наада. Бастакы семестргэ электриктэр уонна сварщиктар аҥардарын кэриҥэ идэлээх буолуу кыһаллан үөрэнииттэн тутулуктааҕын өссө да ситэ өйдүү иликтэрэ көһүннэ. Онон, инникитин ыҥырыыга сылдьар, астына ааттанар идэлээх буолан, дьиэ кэргэттэригэр үп-харчы куруутун баар буолуон баҕарар уолаттар мантан салгыы идэлэнэр үөрэхтэригэр кыһаллалларыгар баҕарабын.
Билигин да ыйыллыбыт идэлэргэ үөрэнэр оҕолор төрөппүттэрэ үөрэнии иһин төлөбүрдэрин киллэрэ иликтэринэн преподавателлэр хамнастарын ылбакка сылдьаллара үлэлиир дьоҥҥо соччото суоҕун, үлэни атахтыан сөптөөҕүнэн манна үлэлэһэргэ этилиннэ. Бу идэлэргэ үөрэнэр оҕолор доруобуйалара ыарахан усулуобуйаны тулуйарга бары өттүнэн эппиэттиир буолуохтаахтарынан анал медицинскэй справканан бигэргэтиигэ көрдөрүнүөхтээхтэр.
Бу сыл бастакы аҥарыгар оскуола уонна колледж бииргэ үлэлээһиннэрин былаанын дьүүллэһии буолла. Онно көстөрүнэн ый аайы методическай күннэр, сүбэлэһиилэр, үөрэнээччилэргэ колледж базатыгар практическай дьарыктар, ыам ыйыгар колледж аһаҕас аанын күннэрэ, бэс ыйыгар производственнай объектарга үөрэммити чиҥэтэр хас да күннээх практическай дьарыктар ыытыллыахтаахтар.
Улууска саҥа саҕаламмыт, оҕону оскуолаттан саҕалаан инники олоҕун оҥостор тирэҕэ буолар үөрэххэ үөрэтии кини бэйэтин туһугар ыытылларынан кыһаллыахпытын наада. Кэлэр сылларга өссө элбэх оҕо үөрэнэн тус олохторугар да сатабыллаах дьон буолан тахсалларыгар кыһалларгытыгар ыҥырабын.
В.ВИНОКУРОВ.
Хаартыскаҕа:
колледж директора Е.В.Попов..
