Бу үүммүт сылга РФ Үбүн министерствота бөдөҥ государственнай хампаанньалары приватизациялааһын суотугар 1 трлн солк. үбү аахсарга суоттанар. Олунньу 1 күнүгэр дойду аҕа баһылыга В.В.Путин ыыппыт мунньаҕар кэккэ тэрилтэлэр гос. актыыптарын атыылыыр туһунан ырытыы оҥоһулунна. Бу мунньахха судаарыстыба суотугар баар «АЛРОСА» АК 19% акциятын атыылыыр туһунан кэпсэтии эмиэ барда.
Дойду Правительствотын чилиэннэригэр В.В.Путин приватизация хайдах барыахтааҕын туһунан этэригэр приватизация ыытыллыыта ыраас, аһаҕас буолуохтаах диэбит. Маны тэҥэ А.А.Путин государство хонтуруоллуур бөдөҥ тэрилтэлэр гос. активтарын атыылыыр экономическай өттүнэн табыгастааҕын эппит: «Государство кимиэхэ тугу атыылыырын чуолкайдык өйдүөхтээх, кэнэҕэскитин бүтүн салаа үлэтэ, бүтүн экономикабыт сайдыыта харгыстамматын инниттэн», - диэн. Маны таһынан дойду аҕа баһылыга В.В.Путин, стратегическай предприятиелары хонтуруоллааһын государство өттүттэн баар буолуохтааҕын уонна дойду юрисдикциятыттан приватизацияланар актыыптар тахсыа суохтаахтарын туһунан эппит.
Дойду бөдөҥ тэрилтэлэрин акцияларын атыылыыр туһунан 2015 сыллаахха Росимущество салайааччыта Ольга Дергунова эмиэ этэн турар. Онно кини Росимущество дойду бөдөҥ гос.компанияларын акцияларын приватизациялыырга техническэй өттүнэн бэлэммит диэн туран: «Аан дойду рыногар балаһыанньа көммөккө турарын өйдүүбүт. Өскөтүн дойду Президенэ бу быһаарыыны өйөөтөҕүнэ, приватизациялыан сөптөөх активтардаахпыт. Бу барыта биллэр компаниялар: «Роснефть», «РусГидро», «АЛРОСА», «Аэрофлот». Бу компаниялар активтара биржаҕа сыаналаналлар», - диэн.
Биһиги республикабыт киэҥ туттуута, үппүтүн-харчыбытын, олохпут уйгутун ситимниир «АЛРОСА» компания акциятын сүрүн бас билээччи Росимущество, манна 43,9% акция, Саха сирэ 25%+1 акциялаах, өссө 8% алмаастаах түөлбэҕэ киирэр Бүлүү бөлөх улуустарын бас билиитигэр баар. 2013 сыллаахха ыытыллыбыт «АЛРОСА» акционердарын кытта түһэрсиллибит сөбүлэһиигэ олоҕуран, РФ уонна Саха республиката компания акциятын тус хонтуруолугар хаалларыахтаах диэн тураллар.
Үүммүт сыл тохсунньу ыйыгар РФ Президенин Уһук Илин уокуругун полпреда, РФ вице-премьера Юрий Трутнев компаниялары приватизациялааһыҥҥа тус көрүүтүн этэн турар: «Компанияны барытын приватизациялыыр улахан куттала суох дии саныыбын, онон бу хайысхаҕа үлэ салгыы ыытыллыахтаах. Биһиги дойдуга стратегическай суолталаах уонна рынокка ханнык компаниялар табыгастаахтык үлэлииллэрин быһаарыахпытын эрэ наада. Өскөтүн компания сорох өттүн приватизациялыыр буоллахха улахан куттал манна суох, хата маныаха үлэ-хамнас өссө аһаҕастык барыаҕа, дьэҥкэ буолуоҕа. Оттон компания акциятын барытын атыылыыр буоллахха, бастаан биири өйдүөххэ, быһаарыахха наада: государство бас билиитигэр тоҕо хаалларары, сүрүн биричиинэни, төрүөтү. Экономика уларыйар, балаһыанньа эмиэ уларыйар», - диэн...
СИА.
