Соторутааҕыта, Өрөспүүбүлүкэ күнүгэр, Россия Пенсионнай фондун Саха Өрөспүүбүлүкэтинээҕи отделениетыгар 2015 с. үлэ түмүгүнэн сыл аайы ыытыллар куонкурус түмүгэ таһаарылынна. Манна таарыччы аҕыннахха 2015 с. түмүгүнэн РПФ СӨ отделениета Уһук Илиҥҥи федеральнай уокурукка бастыҥынан ааҕылынна.
Өрөспүүбүлүкэтээҕи куонкурус түмүгүнэн республика бастыҥ үлэлээх управлениетын аатын Томпо улууһунааҕы пенсионнай управление коллектива (начальник А.В.Атакова) ылла. Оттон үлэ салааларынан 4 бастыҥ үлэлээх управлениеҕа номинациялар туттарылыннылар. Ол иһигэр биһиги улууспут А.Г.Постникова начальниктаах пенсионнай управление коллектива «Страховой усунуостары хомуйууга бастыҥ үлэлээх управление» номинацияны тутта. РПФ СӨ отделениетын управляющайа Георгий Степанов наҕарааданы туттарарыгар Тааттатааҕы управление коллектива электроннай отчуоту үрдүк хаачыстыбалаахтык толорорун бэлиэтээтэ.
Улуустааҕы пенсионнай управлениеҕа страховой усунуостары холуйар, персонифицированнай учуоту ыытар, иэһи-күүһү ирдэһэр үлэни түөрт киһилээх бөлөх сүрүннүүр. Бөлөххө бөлөх салайааччыта С.Г.Тистяхова, Е.Е.Жуллярова, У.В.Васильева курдук үлэлэрин түмүгүнэн өрөспүүбүлүкэҕэ үчүгэй ахсааҥҥа сылдьар улахан уопуттаах специалистар бааллар. Кинилэри сэргэ бу бөлөххө эдэр кэскиллээх үлэһит Л.Е.Сергеева таһаарыылаахтык үлэлиир. Бөлөх коллектива 2009 с. түмүгүнэн электроннай отчуоту түһэриигэ, 2011 с. персонифицированнай учуоту ыытыыга өрөспүүбүлүкэҕэ бастакы миэстэни ылбыта.
Түмүккэ, улуустааҕы пенсионнай управление коллективын быйылгы ситиһиилэринэн эҕэрдэлээн туран, инникитин өссө үрдүк таһаарыылаахтык үлэлииригэр, саҥаттан саҥа үрдэллэри дабайан иһэригэр баҕарабыт.
Бэйэбит инф.
