"Тупсаҕайдык туттан олоруу" сылынан нэһилиэктэргэ туох үлэ барарын ыйыталаһан Чычымах нэһилиэгин баһылыгын солбуйааччытын И.П.Ефимованы кытта телефоннаһан кэпсэттим:
- Изумира Петровна, "Тупсаҕайдык туттан олоруу" сылынан эһиги нэһилиэкккитигэр туох үлэлэр ыытыллан эрэллэрий, нэһилиэк олоҕун-дьаһаҕын туһунан кыратык сырдатан кэпсиэххит дуо?
- 2016 сыл "Тупсаҕайдык туттан олоруу" сылынан биллэриллибитэ. Ол курдук Чычымах нэһилиэгэр субуотунньуктар ыытыллыбыттара. Түөлбэлэр тыа иһигэр сууллубут, эргэ мастары ыраастаабыттара. Ону таһынан нэһилиэк олохтоохторугар икки Камаз массыынанан Бэстээхтэн тутуу матырыйааллара кэлбитэ. Бу сылга «Аллея трудовой славы» ситэриллиэхтээх.
Аны туран нэһилиэк иһигэр уонна таһыгар баар күөллэр аһары туоланнар олохтоохторго кутталы үөскэтэллэр, ол иһин тыраахтарынан ханааба хаһан ууларын Аммаҕа түһэрии үлэтэ ыытыллар. Тараҕана диэн сайылык суола өрөмүөннэнэр.
- Эһиги нэһилиэккит кырдьаҕас нэһилиэк буолар. Саҥа тутуулар төһө баралларый?
- Бөһүөлэк сайдар, тупсар, ол курдук билигин 5 ыал дьиэ тутта сылдьар. Олохпут сайдан иһэрэ биллэр. Быйыл 5 ыал бэйэлэрин дьиэлэригэр септик туруорунаары сылдьаллар. Оччоҕуна дьиэлэрин толору хааччыллыылаах гына толору оҥостор кыахтаналлар. Өссө балыыһа дьиэтэ ситэри тутуллуоҕа. Нэһилиэкпит тэриллибитэ 95 сылын чэрчитинэн түөлбэлэр икки ардыларыгар сыл устата культурнай уонна спортивнай тэрээһиннэр түмүктэринэн кыайыылаахха 100 тыһыынча сууммалаах оҕо оонньуур площадката туруохтаах. Субуотунньук тэриллэн, 300 устуука тутуу маһа киирбитэ. «Прогресс» ПО маҕаһыына тутулла сылдьар. Бу күһүн бүтэриэхтээхтэр.
- Нэһилиэк сайдыытыгар өссө туох үлэлэр ыытыллалларый?
- «Саха суоллара» ОАО тэрилтэ генеральнай дириэктэрэ В.Г.Малышев бэйэтин үбүгэр нэһилиэк ис суолларын оҥорон тупсарбыта. Быйыл ону салгыы үлэ ыытыахтаах. Ону таґынан оттуур ходуһа күрүөтүн тутуутугар 20 киһилээх студеннар тутуу этэрээттэрэ кэлиэхтээх.
- Кэпсээҥҥит иһин махтал.
А.БУРЦЕВ.
