Тохсунньу бүтүүтэ Чурапчытааҕы физкультура уонна спорт институтун ректора И.И.Готовцев уонна физкультура тренердэрэ кэлэн, спортинститут идэҕэ туhаайар үлэтин билиhиннэрдилэр уонна институкка туттарсыан баҕалаах оҕолортон ОФП (основы физической подготовки) нормативтарын туттулар. Манна уопсайа 16 оҕо туттарда. Оҕолор көрдөрүүлэрэ куhаҕана суох буолан, сертификат ыллылар. Маннык сертификаттаах оҕолор институкка киирэллэригэр ОФП-ны хос туттарбаттар. Эбэтэр бу баалларын көрдөрүүтүн тупсарыахтарын баҕарар буоллахтарына, саас Чурапчыга туттарса тиийэн, хаттаан туттарыахтарын сөп.
Ону таhынан Чурапчытааҕы институт ректора И.И.Готовцев улуус дьаhалтатын дьиэтигэр физкультура уонна ДЮСШ тренердэрин ыҥыран, спорт сайдыытын боппуруостарын тула кэпсэттэ. Кини Чурапчытааҕы государственнай институт иhинэн Олимпийскай эрэл училищета аhыллыбытын, онно Саха сирин уонна Россия үрдүк кылаастаах тренердэрэ үлэлиэхтээхтэрин, онон Саха Јрөспүүбүлүкэтигэр икки Олимпийскай эрэл училищета баар буолбутун туhунан үөрүүлээх сонуну иhитиннэрдэ. Манна үрдүк кылаастаах спортсменнары иитэн таhаарар туhуттан элбэх тутуу ыытыллара, улахан уопсай дьиэ, тренердэр олорор дьиэлэрэ, саҥа, улахан, элбэх функциялаах спортзал, институт лабораторията тутуллаллара күүтүллэр. Бу тутуулар үптэрин-харчыларын барытын республика буолбакка, Россия уйунуохтаах диэтилэр. Түмүккэ, ректор үчүгэйдик үөрэнэр студеннар төрөппүттэригэр Махтал суруктары туттартаата уонна Таатта олохтоохторун оҕолоргутун Чурапчы институтугар үөрэттэрэ ыытыҥ диэн ыҥырда.
Иккиhинэн, дойду олохтоохторо эт-хаан өттүнэн чэгиэн-чэбдик, үчүгэй физическэй туруктаах буолалларын күүскэ ирдээн эрэллэринэн, спорка улахан болҕомто ууруллар буолла. Физкультура учууталларыгар уонна тренердэргэ аттестация туттаралларыгар күүстээх ирдэбиллэр баар буолбуттарын иhитиннэрдилэр. Ол иhин биhиги улууспутугар физкультура учууталларыгар уонна тренердэргэ фундаментальнай курсу ыытыахтарын сөп. Тренердэр салгыы хайаан да магистратураҕа, тренердэр үрдүкү оскуолаларыгар үөрэниэхтээхтэрэ ыйылынна. Ону таhынан оскуолаларга спортивнай кулууптары тэрийдэхтэринэ республикатааҕы Спорт министерствота инвентардарынан, тренажердарынан хааччыйарын туhунан кэпсээтилэр.
Александр БУРЦЕВ.
