Ааспыт сыл бүтүүтэ, аам-даам тымныы сатыылаан турдаҕына, Дьокуускайга Өксөкүлээх Өлөксөй аатынан Норуоттар доҕордоһууларын киинигэр биһиги биир дойдулаахпыт, убайбыт Иван Гаврильевич Нелунов «Күлүгүрбэт күлүктэр» диэн дьикти ааттаах кинигэтин биһирэмэ буолан ааста.
Автор И.Нелунов Саха АССР оскуолаларын үтүөлээх учуутала, «Бочуот Знага» орден кавалера, улуус бочуоттаах гражданина А.В.Хоноехова, В.И.Ленин аатынан Уолба оскуолатыгар өр кэмҥэ директорынан үлэлээбит Г.Ф.Нелунов төрөппүт оҕолоро буолар. Кини Дьокуускайдааҕы, Ленинградтааҕы художественнай училищелары ситиһиилээхтик бүтэрбитэ. Өр кэмҥэ идэтинэн «Сардаана» сувенирнай фабрикаҕа, Дьокуускайдааҕы ювелирнай заводка таһаарыылаахтык үлэлээбитэ. Пенсияҕа тахсан баран, билигин П.А.Ойуунускай аатынан Литературнай музейга үлэлиир. Иван Гаврильевич 2012 с. И.Д.Винокуров тылбааһынан нууччалыы тылынан «В краю родных берез», «Силуэты (записки по следам старых фотоснимков)» диэн кинигэлэри бэчээттэппитэ.
И.Г.Нелунов сүрүн үлэтин таһынан сэдэх, сүтэн эрэр былыргы хаартыскалары мунньар, ирдэһэн хомуйсар, һөрэтэр, чинчийэр дьикти дьарыктаах. Хаартыскаҕа түспүт биир түгэн бүтүн киһи олоҕун эргитэн таһаарар сүдү аналлааҕын ис дууһатыттан ылынан, дьон-сэргэ билиитигэр таһаарбыт, үйэтиппит үлэтин сэҥээрдим, астынным. Кинигэ «Күлүгүрбэт күлүктэр» диэн дьикти таабырыннаах ааттааҕа болҕомтону тардар. Автор өр кэмҥэ айымньылаахтык үлэлээбит...
