Билигин биһиги күннээҕи олохпутугар техникэтэ суох табыллыбаппыт. Оппут-маспыт бэлэмэ, тиэйэр-таһар үлэбит - барыта техникэ күүһүнэн толоруллар, ханна эмэ айанныыр буоллахпытына массыыната суох табыллыбаппыт. Оттон бу техникэни илдьэ сылдьыы, көрүү-истии - барыта быраабылалаах, ирдэбиллээх. Дьэ, ону «Госкомтехнадзор» инспекциятын үлэһиттэрэ көрөллөр-истэллэр, сүрүннүүллэр, хонтуруоллууллар, дьаһайаллар. Бу күннэргэ улууска «Госкомтехнадзор» республикатааҕы управлениетын начальнига Н.Н.Попов кэлэн, улуус туһааннаах салайааччыларын, специалистарын кытта көрсөн, санаа атастаһан, ыытыллар үлэни-хамнаһы билсэн, мунньахтаан барда.
Мунньаҕы улуус баһылыгын бастакы солбуйааччы Н.И.Унаров иилээн-саҕалаан ыытта. Сүрүн иһитиннэриини «Госкомтехнадзор» управлениетын начальнига Н.Н.Попов оҥордо. Кини туһааннаах тэрилтэ быйыл 58-с сылын үлэлии олорорун, тэрилтэ үлэтин сүрүн хайысхаларынан, бастакытынан, гражданин сүрүн баайын-дуолун - техникэтин регистрациялыырын, иккиһинэн, техникэни туһаныы быраабылатын тутуһууну, техникэ куттала суох туһаныллыытын хонтуруоллуурун, техникэ куттала суох буоларын ситиһэр туһуттан трактористары, машинистары уо.д.а. бэлэмниир үөрэх тэрилтэлэригэр көҥүл биэрэрин, үөрэхтэрин бүтэрбит дьонтон права туталларын, үсүһүнэн, техникэ техническэй ресурсатын быһааран, сыана быһалларын, ол сыанаҕа олоҕуран, техникэ атыыланар сыаната быһаарылларын, саҥа атыылаһыллыбыт техникэ заводской дефектээх буоллаҕына, туоһулуур докумуону биэрэрин, төрдүһүнэн, хаһаайыстыбаннай кинигэттэн көрөн, учуокка турбатах техникэ баарын-суоҕун, ол техникэҕэ нолуок төлөнөрүн дуу, төлөммөтүн дуу быһааран, нолуок органнарыгар биллэрэллэрин уо.д.а. тустарынан быһааран биэрдэ...
Н.ИОВЛЕВ.
