Соторутааҕыта Таатта улууһун дьаһалтатын сакааһынан Россияҕа Киинэ сыла биллэриллибитинэн, Н.Е.Мординов–Амма Аччыгыйа төрөөбүтэ 110 сылынан, Саха сирин олоҕун көрдөрөр энциклопедия буолбут "Сааскы кэм" романа суруллубута 70 сылынан "Саха фильм" автономнай тэрилтэ (директор Степан Елисеевич Ноговицын) Хоптолооххо Амма Аччыгыйа төрөөбүт алааһыгар "Сааскы кэм" роман бастакы чааһынан киинэни устуу саҕаланна. Киинэ режиссера Алексей Романовтыын кэпсэтиигэ кини Амма Аччыгыйа айымньытынан өрөбөлүүссүйэ иннинээҕи саха ыалын олоҕун айымньы сүрүн дьоруойа Микиитэ уобараһынан көрдөрөр сыаллааҕын эттэ. Биһиги киинэ уһуллар күнүгэр Хоптолооххо тиийбиппит, киинэ кэрчиктэрин уста сылдьаллара. Киинэ уһулларын саҥа көрөр дьоҥҥо туһугар интэриэһинэй. Балаҕан аттыгар тиийбиппит художник Парасковья Павлова кыһамньытынан былыргы саха ыалын дьиэтин таһа сиэрин ситэн оҥоһуллан турар эбит. Саах сыбахтаах балаҕан, кыбыыга от, сылгы, ыт, сыарҕалаах оҕус, былыргылыы ыаллартан, музейтан ылыллыбыт таҥастары кэппит сүрүн геройдар – Микиитэ оруолун оонньуур Алеша Петров, Ытык Күөл 1 нүөмэрдээх оскуолатын 4 кылааһын үөрэнээччитэ, Сөдүөччүйэ - Дьохсоҕонтон төрүттээх, Дьокуускайдааҕы культура колледжын бүтэрбит Сардана Вырдылина – Попова, Миитэрэй - Павел Ченянов уонна Дьөгүөрдээни оонньооччу Федот Львов оруолларын толоро сылдьаллара. Режиссер "Мотор", "Камера" диэтин кытта Сөдүөччүйэ уолуйбут көрүҥнээх "Микиитээ, саа тыаһын иһиттиҥ дуо?" - диэбитинэн сыарҕаттан түһэн дьиэтин диэки сүүрэр. Сөдүөччүйэ уолуйбут хараҕа, эппэҥнэс буолан тылларын быһа баттаан саҥарара алдьархай ааҥнаабытын биллэрэр. Микиитэ уол чаҕааран, оруолугар чахчы барсар дьоһун киһи. Сүрүн дьоруойга сөптөөх артыыс оҕону булаары режиссер икки сүүсчэкэ оҕону араас күрэхтэһиилэринэн, кастиҥҥа тала сатаабытын, сөптөөх оҕо көстөн биэрбэтэҕин, онтон бу Алеша уолу видеоролигынан көрөн баран, "Сосновый бор" лааҕырга сынньана сылдьарыгар кэпсэтэн, талан ылбытын иһитиннэрдэ. Сардаана Вырдылина бэйэтэ кэпсииринэн, кастиҥҥа кыттарыгар кинини ылыахтара диэн эрэлэ суох сылдьыбыт, бэйэтэ тас көрүҥүнэн сырдык хааннаах кыыс Сөдүөччүйэ оруолугар хантан барсыамый дии санаабыт, онон кинини талбыттарыгар соһуйбут, үөрбүт, дьолломмут. Ол эрэн гример Наталья Томская Сардаананы омос көрөн киһи соһуйар гына кырааска, грим көмөтүнэн өрөбөлүүссүйэ иннинээҕи саха дьахтарын уобараһын айбыт. Бэл диэтэр тиистэрин саһардан, хараардан оҥорбута киһини сөхтөрөр. Режиссер Алексей Романов билиһиннэрбитинэн, былаан быһыытынан Хоптолооххо кыһыҥҥы, сааскы уонна сайыҥҥы хартыыналары түһэриэхтээхтэр уонна киинэни күһүн бүтэриэхтээхтэр.
Онон сотору кэминэн Амма Аччыгыйа "Сааскы кэм" романа экраҥҥа киинэ буолан,көрөөччүлэри сэҥээрдиэ.
А.ПОСЕЛЬСКАЯ.
