Улуу хомусчут Лука Турнин төрүт ааспыты түбэһэн истэргэ, билэ сатыырга кыһаллара. Кини балай эмэ эппит-тыыммыт үгүс үһүйээниттэн, нохтолоох номоҕуттан эллэнэн тахсыбыт аарыктаах хомуһу аан маҥнай ыраас ытыспытыгар ууран көрдүбүт уонна бар дьоҥҥо көрдөрөн, кэпсээн кэлэр кыахтанныбыт. Оттон маннык кыах, биллэн турар, биһиэхэ тимир ууһуттан эрэ бэриллэр аналлаах. Л.Н.Турнин аарыктаах хомус атын сиргэ ханна оҥоһулла сылдьыбытын ирдэһэ, токколооһо сатаан баран, чахчыта Тааттаҕа эрэ оҥоһуллубутун туһунан эппитэ суруллан хаалбыта баар. Аан дойдутааҕы хомус түмэлин фондун үлэһиттэрин сорудахтарынан оҥорторо сатаабыт ууспут олох кыайан ылымматаҕа. Ол эмиэ да сөп эбит. Кини саҥа үйэ саҥа ууһа буоллаҕа. Оттон былыргы үйэтээҕи дорҕоон өйдөнө охсон биэрбэккэ, баҕар, атыҥыраабыта да буолуо. Эбэтэр олус эдэрин иһин, арыый эрдэ эбит диэн эмиэ ылынымыан сөп.
Аарыктаах хомус чопчу хайа кэмҥэ айыллан, тардыллан ааспыта биллибэт эрээри, Л.Н.Турнин истибит кэминэн сэдиптээтэххэ ол ааспыт үйэбит олох саҥатыгар, эбэтэр өссө арыый эрдэ да буолуон сөп. Онон маннык өрдөөҕү хомуһу ыллыҥ да, мээнэ оҥоро охсоруҥ олус судургута суох үлэ. Ону арай Л.Н.Турнин төрөппүт кыыһа Ираида Лукинична биһиги биир бастыҥ хомуспут ууһугар П.Н.Быгынановка оҥорторбута оруннаах дии саныыбын. Тоҕо диэтэххэ кини былыргыны ыллыктаан ылынан уһанар уус. Онто бу оҥорбут хомуһугар да көстөр. Бастакытынан, хомус бэйэтэ аныгылыы эллэммит.
Иккиһинэн, аарыга (тылын кытта аарааҥҥа диэри аргыстаһа сыыйыллар тимирэ) боростуой алтан курдук болоорхой.
Үсүһүнэн, чыллырҕас тимирдэрэ үрүҥ көмүс көстүүлээхтэр, тэбис-тэҥ төгүрүк быһыылаахтар.
Төрдүһүнэн, ол төгүрүкчээннэр бары биир тэҥ харысхал бэлиэлээхтэрин биһирээтибит.
Бэсиһинэн, хомус эргиччи көстө турарыгар анал ууруллар миэстэлээҕэ олус тупсаҕай.
Прокопий Никитич оҥорбут хомуһун Хаҥаласка виртуоз-хомусчут С.С.Шишигин, Намҥа Нам Турнина — Д.И.Кривошапкин курдук хомусчуттар улаханнык долгуйа-долгуйа тардан көрдүлэр. Аарыктаах хомус чыллырҕастара тартахтарын ахсын тэҥҥэ охсуллан иһэллэрин олус сэргии истэн дуоһуйдулар. Атыттар аны маннык хомус баар эбит дуу дэһэн, улаханнык сонургуу көрдүлэр. Икки улуус оператордара болҕомтолорун ууран туран устан уоскуйдулар. Онон атын да уустар болҕомтолорун ууралларыгар, туох эмэ толкуйу тобулан таһааралларыгар саҕалааһын сырдыга саҕылынна.
Хас да сыллааҕыта уус П.Н.Быгынановка ыалдьыттаабыттаахпыт. Онно уһанар сиригэр тыла тостубут, олох былыргы кырачаан хомус сытара. Ол да буоллар бу хомус тылын булан таарыйдахха дорҕоон таһаарар этэ. Уус бу хомуһу харыстыы саныырын, куруук бу уһанар сиригэр сытарыттан олус астынарын туһунан эппитэ. Оччотугар ол ааспыт кэм тимирдэрэ аныгы тимир эллэнэр үлэтигэр уус сатабы-
лын ситэрсэн биэрэ сытарыгар саарбахтааһын суох.
Дьэ, ити курдук Л.Н.Турнин 100 сылын көрсө өссө биир үлэ хайысхата, үс улууһу хабан, алгыстаах аартыга арылынна.
ДЬҮРҮСКЭЭНЭ.
