Бу сыл бэс ыйын 6 күнүгэр улууспут томтойор киинигэр Ытык Күөлгэ, П.А.Ойуунускай мэҥэ өйдөбүнньүгэр Экология уонна дьиэ кэргэн күнүнэн «Чэчирээ, чэлгий, күөх Тааттам!» диэн үтүө үгэскэ кубулуйбут акция төрдүс төгүлүн ыытылынна. Быйыл бу тэрээһин республикаҕа тупсаҕайдык туттан олоруу сылынан уонна Тааттыныскай нэһилиэк төрүттэммитэ 100 сылыгар ананна.
Улууспут киэн туттар ырыаһыта, диктора Светлана Очирова чуор куолаһынан бу тэрээһиҥҥэ кэлбит ыалдьыттары ыҥыран: «Саха өйдөбүлүнэн, орто туруу бараан дойдуга айыллыбыт киһи ыал буолан, мас олордон, аал уоту оттунан кэнниттэн хаалларар кэнчээри ыччаттанан, саха омук олоҕун салҕаан, айыы аймаҕын хаҥатан аҕа ууһун ааттатар ытык иэстээх. Дьиэ кэргэн - олох эргийэр тулааһына, утум-ситим удьуор ууһатыыта, саха саргытын салаллыыта», - диэн туран акцияҕа кыттыыны ылар Тааттыныскай нэһилиэк биир, биэс, уон, уон биэс, сүүрбэ, сүүрбэ биэс, отут, отут биэс, түөрт уон, түөрт уон биэс уонна биэс уон сыл бииргэ олорбут үтүө мааны дьиэ кэргэттэрин сэлэлии хааман киирэллэригэр ыҥырда. Ол курдук, ыал буолан, унаар буруону тэнитэн олорбут ытык мааны ыаллар ортолоругар бааллар, кыһыл көмүс сыбаайба үбүлүөйүн көрсүбүт: Алефтина Иннокентьевна уонна Егор Егорович Захаровтар, Евдокия Михайловна уонна Егор Егорович Ефимовтар; 45 сыл иллээхтик олорбут, сапфир таас үбүлүөйдээхтэр: Людмила Васильевна, Николай Николаевич Огонеровтар, Марфа Петровна, Степан Петрович Татариновтар, Тамара Михайловна, Афанасий Михайлович Бояровтар, Раиса Семеновна, Владимир Викторович Аржаковтар; 40 сыл, рубин таас сыбаайбалаахтар: Елена Филимоновна, Владимир Иннокентьевич Кузьминнар, Люция Петровна, Карл Иванович Христофоровтар уо.д.а. уопсайа 25 ыал кыттыыны ыллылар.
Үтүө мааны дьиэ кэргэттэри, мустубут дьону «Таатта улууһа» МО баһылыгын солб. И.А.Сивцева, «Таатта нэһилиэгэ» МТ баһылыга Е.И.Павлов, Тааттатааҕы ГТАС салаа салайааччыта Н.В.Пестрякова, улуус дьахталларын Сэбиэтин председателэ М.М.Аммосова эҕэрдэлээн тыл эттилэр.
Салгыы акция кыттыылаахтара үтүө үгэскэ киирбит төрөөбүт түөлбэбит, ытык сирбит күөҕүнэн чэлгийэрин туһугар Ленин уулуссатынан, Хоту, Аартык, Куула уонна Кэскил түөлбэлэринэн, Кулаковскай уулуссатынан, Өксөкүлээх Өлөксөй скверигэр «Сайдам» түөлбэ олохтоохторо күөх маһы олортулар.
Бүгүҥү акцияҕа 15 сыл олох устун бииргэ хаамар, 4 оҕо амарах төрөппүттэрэ Анна уонна Петр Татариновтар кыттыыны ыллылар. Дьиэ кэргэн аҕа баһылыга Петр Елизарович бүгүҥҥү акцияҕа кыттыыны ылар үбүлүөйдээх дьиэ кэргэҥҥэ эҕэрдэтин тиэрдэн туран, маннык тэрээһиннэр ыытыллаллара наадалааҕын, туһалааҕын бэлиэтээтэ. Түгэнинэн туһанан нэһилиэк, улуус дьаһалтатыгар үтүө акцияны тэрийбиттэригэр махталын эттэ. Тупсаҕайдак туттан олоруу сылынан кыттыыны ылалларыттан үөрэллэрин, оҕолоругар бу биһиги дьиэ кэргэн олордубут маһа диэн көрө сылдьыахтарын туһунан эттэ.
Бу күн Ытык Күөл киинигэр турар Кыайыы болуоссатыгар «Айылҕаана» нэһилиэк далбар эбэлэрин, ийэлэрин түмсүүтэ уонна 2-с нүөмэрдээх орто оскуола иһинэн үлэлиир «Батас» спортивнай-патриотическай лааҕыр оҕолорун көмөтүнэн 1000 сибэккини, талаҕы олортулар.
Онон «Чэчирээ, чэлгий күөх Тааттам» акцияҕа нэһилиэк олохтоохторо эдэрдиин-эмэнниин, оҕолуун бары кыттыыны ыллылар.
Бэйэбит инф.
