Педагогическай үлэ, Аҕа Дойду Улуу сэриитин ветерана «Албан аат» 3 степеннээх орденын кавалера, РСФСР үөрэҕириитин туйгуна, любитель-режиссер П.В.Толстяков аатынан Чөркөөх народнай театра быйыл 5 төгүлүн улуус үөрэнээччилэригэр «Эдэр актер» театральнай конкуруhу тэрийэн ыытта.
Сыл ахсын ыытыллар конкурс кыттааччыта эбиллэн иhэр. Конкурс быйылгы хайысхалара үгэс курдук уларыйбатылар (Уран ааҕыы, олоҥхо, инсценировка, режиссерскай холонуу). Конкурс народнай суруйааччы Д.К.Сивцев-Суорун Омоллоон үбүлүөйдээх сылыгар ананарынан суруйааччы кэпсээннэринэн инсценировка көрдөрүүтэ уонна А.И.Софронов-Алампа сырдык кэриэhигэр уран ааҕыы, Ийэ олоҥхоhут П.Е.Решетников аатын үйэтитиигэ олоҥхону биирдиилээн, бөлөҕүнэн толорууну көрүү буолла. Улуус оскуолаларыттан 9 коллектив, Чөркөөхтөн «Аленушка», Ытык Күөлтэн «Сулусчаан» оҕону сайыннарар уhуйааннар иитиллээччилэрэ көхтөөхтүк кытыннылар.
Уус-уран ааҕыыга бастыҥ толорооччуларынан Сережа Плотников 1-кы №-дээх ЫКОО 2 кылааhын үөрэнээччитэ, Нарыйа Дмитриева «Аленушка» уhуйаан иитиллээччитэ, Дьулус Габышев Тыараhа оскуолатыттан буоллулар. Бөлөҕүнэн уус-уран ааҕыы кыайыылаахтарынан «Аленушка» оҕо уhуйаанын иитиллээччилэрин бастакы, иккис бөлөхтөрм Чөркөөхтөн, «Күнчээн» фольклорнай бөлөх Ытык Күөлтэн таҕыстылар.
Олоҥхону биирдиилээн толорууга улахан бөлөххө 1 миэстэни Сайыына Яковлева Чымынаайы, 2 миэстэни Ньургун Халыев Тыараhа, Алеша Петров Чөркөөх ыллылар. Онтон кыра бөлөххө 1 миэстэ Лилия Чехченнонова Тыараhа, 2 миэстэни Ньургун Кривошапкин «Сулусчаан» оҕо уhуйаана Ытык Күөл буоллулар. Олоҥхону бөлөҕүнэн толорууга бастыҥнарынан 1-кы №-дээх ЫКОО 1 кылааhын үөрэнээччилэрэ К.Туйаарыскай «Быыра Баадьай», Чөркөөх «Аленушка» уhуйаан П.Е.Решетников-Көhөҥө Бүөтүр «Күн Күндүлү Бухатыыр», Дьохсоҕонтон «Күнчээн» бөлө «Ордьоот оҕонньор», Ытык Күөлтэн «Хоту» түөлбэттэн «Күнчээн» фольклорнай бөлөх, Чөркөөхтөн 5 - 11 кылаас үөрэнээччилэрэ «Ала чуоҕур аттаах Араап Мохсоҕоллой Бухатыыр», Чөркөөхтөн «Көөчүк» фольклорнай бөлөх С.Васильев «Эрчимэн Бэргэн» олоҥхолортон толороннор кыайыылааҕынан таҕыстылар.
Инсценировкаҕа 1 миэстэлэри Ытык Күөл 1-кы №-дээх оскуолатын үөрэнээччилэрэ «Көмүс муос», Тыараhаттан «Ача» драмкуруhуок оҕолоро «Хараҥаҕа тыкпыт сырдык», 2 миэстэлэри Чөркөөх оскуолатын 6 кылааhын үөрэнээччилэрэ «Бэйэтэ эмтиэкэ», эмиэ бу оскуолаттан «Сайсары» драматтан быhа тардыыны, 3 миэстэлэри Уус Таатта оскуолатын кукольнай студия оҕолоро «Хотойдор хоту көтөллөр», Чөркөөхтөн 8 кылаас үөрэнээччилэрэ «Муммуттар» айымньылары көрдөрөн ылары ситистилэр.
Куонкурус саамай күүтүүлээх оҕо аймах сөбүлээн кыттар түhүмэҕэр «Режиссерскай холонууга» элбэх оҕо
кытынна. Бэриллибит темаҕа эбэтэр бэйэлэрэ талан сыаҥка туруорарга холоннулар. Манна күрэхтэhэ кэлбит оҕо үксэ кыттан ыра санааларын олоххо киллэрдилэр. Дьохсоҕон, Уус Таатта, Ытык Күөлтэн «Кустук» оҕо театрын, Чөркөөх, 1-кы №-дээх оскуола оҕолоро көхтөөхтүк кытыннылар. «Көрөөччү биhирэбилэ» анал ааты Чөркөөх оскуолатын 10 кылааhын үөрэнээччитэ Айсен Охотин ылла. Онтон «Таатта-такси» анал бирииhин – босхо айан путевкатын 6 кылаас үөрэнээччитэ Коля Борисов тутта...
Матрена ЯКОВЛЕВА,
Чөркөөх народнай театрын режиссера, СР үөрэҕириитин туйгуна,
Чөркөөх.
