Соторутааҕыта Бүтүн Россиятааҕы библиотека күнүн көрсө олохтоох библиотекарбыт Марина Кимовна Малышева, «Айылгы» сынньалаҥ киинин директора М.К.Решетникова уонна уус-уран салайааччы Т.А.Кириллина сэргэх биэчэри тэрийдилэр. Билиҥҥи кэмҥэ үгүс бэлиэ күннэр, үбүлүөйдэр утум-ситим кэлэн иһэллэр. Онон биир тэрээһиҥҥэ хаһы да дьүөрэлээн ыытар табыгастаах.
«Ахтыаҕыҥ, ол ааспыт сыллары...» диэн дьоро киэһэ Аммабыт нэһилиэгэ төрүттэммитэ 95 сылыгар туһуланна. Дьоро киэһэ бастакы чааһа - киэн туттар биир дойдулаахпыт Аҕа дойду Улуу сэриитин кыттыылааҕа, байанайдаах булчут, суруйааччы, олоҥхоһут, общественнай корреспондент Михаил Герасимович Соров I төрөөбүтэ 100 сылыгар ананна. Бу дьикти киһи олоҕун-дьаһаҕын, үлэтин-хамнаһын туһунан тэрээһини киһи эрэ сэргиир гына Мария Николаевна Беркина, Елена Петровна Малышева иилээн-саҕалаан ыыттылар.
Михаил Герасимович Аҕа дойдутун көмүскээбитэ олоҕун биир умнуллубат кэрдииһэ. Кини төһө да аҥар илиитин сүтэрдэр, сэрииттэн эргиллээт тыа хаһаайыстыбатын араас үлэтигэр үтүө суобастаахтых үлэлээбитин туоһутунан Саха Өрөспүүбүлүкэтин Үрдүкү сэбиэтин Бочуоттаах грамоталара, Москваҕа Тыа хаһаайыстыбатын быыстапкатыгар икки төгүл сылдьыыта туоһулуур. Михаил Герасимович Чычымах кулуубун сэбиэдиссэйинэн олус таһаарыылаахтык үлэлээбитэ, бэйэтэ айылҕаттан талааннаах артыыс киһи этэ. Өр кэмҥэ библиотекарынан үлэлээбит, элбэх көлүөнэ ыччаты билиигэ-көрүүгэ сирдээбит, ааҕарга уһуйбут Агафья Петровна Кулаковская коллегатын, аҕа саастаах табаарыһын туһунан суруйуулары, Михаил Соров хаһыакка тахсыбыт айымньыларын, очеркаларын кичэллээхтик сыһыаран альбом оҥорон үйэтиппитин бу киэһэ сырдаттылар. Билигин Михаил Герасимович толорбут олоҥхото радио фондатыгар уурулла сытар. Кини Саха сирин суруйааччыларын холбоһугун чилиэнэ, ол курдук хоһоон, үгэ, чабырҕах, тойук, кэпсээн, сценка, хоһоонунан кэпсээн суруйара. Михаил Герасимович айымньыларыттан сэттис кылаас уолаттара Костя Попов, Алеша Тарабукин «Булчут ырыата», Иванна Валентиновна Малышева «Кырааскалаах кыыс», олохтоох дьаһалта үлэһиттэрэ «Уйгу уутун уруйдуубут» диэн хоһооннору аахтылар. Кини суруйуутугар «Ферма ыала» сценканы Клавдия Иннокентьевна Михайлова уонна Светлана Павловна Кучукова оонньоон көрдөрдүлэр. Михаил Герасимович ырыаларын сэргэ оччотооҕу кэм ырыалара ылланнылар. Владимир Иннокентьевич Михайлов баяҥҥа доҕуһуоллаан дьоро киэһэни киэргэттэ. Ити курдук, уот сэрии кыттыылааҕа, суруйааччы, олоҥхоһут, алгысчыт, булчут, корреспондент, ыччат наставнига, табаарыстыы суут председателэ, туруу улэһит Михаил Герасимович Соров I чаҕылхай олоҕун ахтан-санаан аастыбыт.
Биэчэр иккис аҥара «Сэбиэскэй кэми сэгэтэн...» ретро-чаас буолла. Манна «Оҕо сааспыт кинигэлэрэ», «Сэбиэскэй кэм сурунааллара», Сэбиэскэй кэмҥэ туттуллубут мал-сал, коллекционердар быыстапкалара турдулар. Бу киэһэ Сэбиэскэй кэм малын-салын сыанатын таайтарар ретро-викторина ыытылынна. Таба эппиэттээбит киһи сэбиэскэй кэминээҕи бөтүүк кэмпиэтинэн биһирэннэ. Урукку кэм музыката доҕуһуоллаах түөлбэлэринэн сэбиэскэй кэминээҕи муоданы көрдөрүү ыытылынна. Библиотека, «Айылгы» сынньалаҥ киин үлэһиттэрэ М.П.Аввакумова, А.И.Гуляева, М.Г.Кириллина тэрээһиннэринэн минньигэс астаах «У самовара» ретро-кафе үлэлээтэ. Баҕалаахтар сылабаар тула олорон аһаатылар. «Саамай элбэх сэбиэскэй харчылаах» конкурска 1 миэстэ Х.М.Богдокумова, 2 миэстэ – Е.А.Григорьева, 3 миэстэ – В.В.Барбасытова буоллулар.
Ретро-киэһэни тэрийиигэ Амма нэһилиэгин түөлбэлэрин салайааччылара С.К.Кычкина, М.В.Охотина, А.Д.Софронова, А.Ф.Унарова сүүрэн-көтөн дьону көҕүлээннэр түөлбэлэр көхтөөх кыттыыны ыллылар, түмсүүлээхтэрин көрдөрдүлэр.
Ити курдук, бэрт сэргэх тэрээһин библиотека күнүгэр тэриллэн дьон-сэргэ дуоһуйан тарҕастылар.
А.Е.ВАСИЛЬЕВА, Чычымах.
