Алтынньы 13 күнүгэр Былатыан Ойуунускай аатынан народнай театрга «Культура – дойду сиэркилэтэ» Таатта улууһун культуратын салаатын саҥа айар сезонун арыйар дьоро күнэ ыытылынна.
Саҥа сезон арыллыытын тэрээһинэ «Киэркэй кэрэ эйгэ» биирдиилээн дьон, тэрилтэлэр, түмсүүлэр культура киинигэр анаан кыһыҥҥы дьиэ сибэккилэрин бэлэх-акциятынан саҕаланна. Салгыы «Олох оҥоһуутун хоһуйуох» культура тэрилтэлэрин, түмсүүлэрин айар-тутар үлэлэрин сырдатар быыстапка-презентациялара ыытылынна. Манна Уус Тааттаттан М.М.Малышева «Туос тойуга» диэн ааттаах туос оҥоһуктара, бу нэһилиэк «Дьүөгэ», «Иис» түмсүүлэрин, Орто Амма нэһилиэгиттэн «Далбар эбэлэр» Улуу Кыайыы 70 сылыгар анаабыт И.В.Сталин төбөлөөх кылынан паннолара, Уус Амматтан кыбытыылаах ииһи баһылаабыт А.Н.Большакова салайааччылаах «Айылгыына» толору ат симэҕэ, кыбытыылаах тигиилэрэ, Игидэйтэн «Оһуор ойуута» түмсүү сахалыы таҥаһа-саба, оҕуруонан киэргэллэрэ, Чөркөөхтөн «Алаһа» эбэлэр түмсүүлэриттэн А.А.Гуляева ат кэмпилиэгин оҥоһуга уо.д.а. үлэлэр көрдөрүүгэ туруорулуннулар. Быыстапкаҕа сылдьыбыт дьон биһиги кэрэ аҥардарбыт үлэлэрин көрөн «талаан норуокка баар» эбит диэн бардылар.
«Сайдыылаах үйэ саҥа арыйыылара» диэн сонун тэрээһиҥҥэ Тааттатааҕы лицей 10-с кылааһын үөрэнээччитэ Софрон Варламов 3Д mах технологиянан оҥоһуллубут мультипликационнай үэлэрин презентацията олус сэргэхтик тэрилиннэ. Үс сыллааҕыта Софрон үлэтэ улууспут иһигэр тахсар «Талба Таатта» сурунаалга бэчээттэнэн турар. Билигин эдэркээн биир дойдулаахпыт үлэтин кэҥэтэн, саҥа технологияны таба туһанан компьютерга мультиктары таҥан оҥорор буолбутун көрөн, чахчы да, үөрдүбүт, сөхтүбүт. Софрон туһунан учуутала В.Н.Элякова бу курдук кэпсиир: «Софрон Тааттатааҕы лицей 10 «а» кылааһыгар информационнай-техническэй кылааска үөрэнэр. Кыра кылаастан ыла 3D mах программанан дьарыктанар. Кини кэккэ ситиһиилэрдээх. Ол курдук, 2015 сыллаахха уонна быйыл Москваҕа «Инникигэ хардыы» дойду иһинээҕи научнай-практическай конференцияҕа икки төгүл 1 степеннээх дипломунан, 2015 сыллаахха Москваҕа ыытыллыбыт «Меня оценят в 21 веке» научнай-практическай конференция кыайыылааҕа. Софрон киһи быһыытынан олус сэмэй, бэйэтин туһунан киэҥник сырдаттарыан баҕарбат. Бу олох күһэйэммит кэлэн кытынна», - диэтэ. Софрон дьоһун үлэтин презентациятыгар оскуола үөрэнээччилэрэ, учууталлара сырыттылар. Манна кини П.А.Ойуунускай «Омуннаах оҕо», «Таал-Таал эмээхсин» остуоруйаны, «Таатта – олоҥхо дойдута» уо.д.а. мультипликационнай үлэтин көрдүбүт. Бу тэрээһиҥҥэ улуус баһылыгын солбуйааччы И.А.Сивцева кыттыыны ылан Софроҥҥа уонна мустубут оҕолорго анаан сүбэ-соргу тылларын эттэ, оттон улуус культураҕа управлениетын салайааччытын солб. М.В.Степанова иһирэх тыллаах «Махтал суругу» кытары «Олоҥхо ыһыаҕын туһунан» дьэрэкээн ойуулаах альбому «салгыы үлэҕэр туһанаргар олук буолуо» диэн ааттаан туттарда. Бииргэ үөрэнэр оҕолоро кэлэн Софроҥҥа итии истиҥ тыллары эттилэр, эҕэрдэлээтилэр. Атын оскуола учууталларыттан Софроҥҥа маастар-кылаас ыытарыгар кэккэ этиилэр киирдилэр.
Дьоро күн түмүктээн уонна саҥа айар сезон арыллыытын бэлиэтээн «Күн сырдыгын күндүтэ – Таатта» диэн ааттаах улуус нэһилиэктэрэ кыттыылаах улахан кэнсиэринэн түмүктэннэ.
C.ХАЛГАЕВА.
