Ыам ыйын 5 күнүгэр улуус киинин бэтэрээннэрэ «Уруйдуубут Улуу Кыайыыны» диэн девизтээх улахан кэнсиэри туруордулар. Кэнсиэргэ өрөспүүбүлүкэ, улуус араас куонкурустарын кыайыылаахтара «Удьурхай», «Оһуордар», «Алдаана», «Хомусчуттар» ансаамбыллар, сцена бэтэрээннэрэ Андрей Сергеев, Константин Иванов, 50-с төгүлүн «Илиҥҥи дойду үҥкүүтүн» үҥкүүлүүр Парфета Полускина уо.д.а. кыттаннар, көрөөччүлэр улахан биһирэбиллэрин ыллылар. Кэнсиэртэн киирбит 17900 солк. барыта «Кыайыы — 75» фондаҕа угулунна. Итини таһынан биирдиилээн дьон К.В.Сорова, А.М., К.А.Хатылыковтар, Е.И.,В.А.Ючюгяевтар, И.П.Варфоломеев, Т.Е.Слепцова, Л.П.Луковцева, А.И.Постникова, Е.И.Ефимова, Т.Д.Иванова Кыайыы фондугар 1600 солк. уган, бэйэлэрин кылааттарын киллэрдилэр. Ордук кэрэхсэбиллээҕэ Ытык Күөл Алампа аатынан 1-кы №-дээх орто оскуолатын 9-с «а» кылааһын үөрэнээччилэрэ 2000 солк.: «Ытыктыыр күндү бэтэрээннэрбитин Кыайыы күнүнэн уонна Кыайыы 75 сылыгар старт биэрэр акция саҕаламмытынан итиитик-истиҥник эҕэрдэлиибит. Баҕарабыт ыраас халлааны, эйэлээх олоҕу, уһун, дьоллоох үйэни! Мэлдьи доруобай, тэтиэнэх буолуҥ, олох үөһүгэр сылдьан, үүнэр көлүөнэ туһугар кыһамньыгыт иһин дириҥник махтанабыт. Инникитин биһиги туһа дьоно буола улаатыахпыт диэн эрэннэрэбит», — диэн суруктаан укпуттара буолла. Түгэнинэн туһанан бэтэрээннэр ааттарыттан бу кылаас оҕолоругар уонна кылаас салайааччыта Т.А.Хатылыковаҕа улахан махталбытын тиэрдэбит уонна үөрэхтэнэн, улуускут кэлэр кэскилин салайсар үтүө дьон буола үүнүҥ диэн баҕа санаабытын тиэрдэбит. Эһиги билиҥҥи үтүө дьыалаҕыт батыһааччылардаах буолуо диэн эрэнэбит.
Улуу Кыайыы 70 сылын көрсө улуус олохтоохторо 4523386,01 солк. хомуйбуттара. Бу үбүнэн араас үтүө дьыала оҥоһуллубута. Онон Кыайыы 75 сылын көрсө бэтэрээннэр саҕалаабыт бачыымнарын өйөөн, улуус олохтоохторо билиҥҥиттэн Кыайыы фондугар үп киллэриитин саҕалыахтара диэн эрэнэбит уонна ыҥырабыт. Киирбит үбү туһанар былаан элбэх. Билиҥҥи көҥүл, дьоллоох олохпут иһин олохторун толук уурбут ытык дьоммут аатын үйэтитиигэ өссө да үгүс үлэ барыан наада. Оттон ол барыта харчыттан тутулуктаах. Онон 2020 сылы күүппэккэ түмсүүлээхтик турунан, тэрилтэлэр, биирдиилээн дьон Кыайыы фондугар үп мунньуутугар күүс-көмө буолуохтара диэн эрэнэбит.
С.БЕРКИНА,
улуустааҕы бэтэрээннэр
сэбиэттэрин бэрэссэдээтэлэ.
