Статистика көрдөрөрүнэн сыл саҥатыгар улууска 6991 үлэлиир кыахтаах киһи баара бэлиэтэммит буоллаҕына, муус устар 1 күнүгэр 7056 киһи баар эбит. Ол иһигэр экономика бары салаатыгар µлэлиир киһи ахсаана 6180, сыл саҕаланыытыгар 6164 буолбут, онон µлэлиир киһи ахсаана 0,3%-нан улааппыт. Сыл саҕаланыыта үлэтэ суох киһи ахсаана 827 эбит буоллаҕына, билигин 842 киһиэхэ тиийэн, 1,8%-нан эбиллибит. Онон үлэлиир саастаах дьонтон 12 бырыһыаннара үлэтэ суох сылдьар. Атын улуустары кытта тэҥнээн көрөр эбит буоллахха ити көрдөрүү Чурапчыга 9,2, Аммаҕа 11, Уус Алдаҥҥа 11,2, Мэҥэ Хаҥаласка 8,6, Намҥа 18, Горнайга 16,1, Дьокуускайга 6,7, республика үрдүнэн 7,4 бырыһыаҥҥа тэҥнэспит.
Быйыл сыл саҕаланыытыттан үлэ көрдүүр 254 киһи учуокка турда. Былырыын 202 киһи этэ (111,4%). 141 киһи үлэтэ суох статуһун ылла, былырыын 129 киһи этэ (109,3%). Муус устар 1 күнүгэр 250 киһи үлэтэ суох статуһун ылан, учуокка турда. Ол иһигэр 104 дьахтар (41,6%), 146 эр киһи баар. Нууччалыы өс хоһоонунан эттэххэ «үлэтэ суох буолуу эр киһи сирэйдэннэ». үлэтэ суох дьон ортотугар 105 ыччат баар (42%). Үлэтэ суохтартан (250 киһиттэн) 116-лара үрдүк үөрэхтээх (46,4%), 97-лэрэ орто анал үөрэхтээх (38,8%), 10 киһи ситэтэ суох орто, эбэтэр орто үөрэҕэ суох эбиттэр (4%), 27 киһи орто үөрэхтээхтэр (11 кылаас, 10,8%). Үлэтэ суох сылдьыы уһуна ортотунан 5,6 ый буолла. Былырыын сыл түмүгүнэн 6,2 ый этэ. Сыл саҕаланыаҕыттан 11 тэрилтэ үлэ миэстэтин сарбыйарын туһунан (сокращение) иһитиннэрдэ. Ол иһигэр сибээс, транспорт тэрилтэлэриттэн 7, кредитнэй тэрилтэлэртэн 3, коммунальнай хаһаайыстыба тэрилтэлэриттэн 3, бюджет тэрилтэлэриттэн 8 киһи сарбыйыыга түбэһиэҕэ. 3 ый түмүгүнэн 58 киһи үлэ булла (быстах үлэлэри киллэрэн туран). Сыл саҕаланыытыттан тэрилтэлэр 135 үлэ миэстэтэ баарын биллэрдилэр.
Муус устар 24 күнүнээҕи туругунан Дьарыктаах буолуу киинигэр 73 үлэ миэстэтэ баара биллэр, ол курдук сүрүннээн эмп үлэһиттэрэ, учууталлар, микробиолог, ветеринар, ыанньыксыт, сибиинньэ көрөөччү наадалар.
Бу дьыл муус устар 23 күнүгэр «Эрэл» дьиэ кэргэн киинигэр «үлэлээх киһи сарсыҥҥылаах» диэн үлэ, үөрэх дьаарбаҥката буолан ааста. Уопсайа уонтан тахса үлэһиккэ наадыйар тэрилтэ кэлэн, кыттыыны ылла. Олор истэригэр улуустааҕы үөрэх управлениета, военкомат, ветеринария управлениета, Тааттатааҕы музей уо.д.а. бааллар. Дьаарбаҥка кэмигэр үлэ биэрэр тэрилтэлэргэ анаан үлэ сокуонун туһунан кылгас иһитиннэрии оҥоһулунна, мунаарар ыйытыыларыгар хоруй бэрилиннэ. Маны таһынан байыаннай комиссариат, «үргэл» (Поколение) үөрэтэр киин бэйэлэрин сүнньүнэн үөрэхтэрин туһунан иһитиннэрии оҥордулар. Уопсайа 59 киһи кэлэн истэн сэргээтэ, чугас сытар улуустарга баар үлэ миэстэлэрин билистилэр. үлэ көрдөөччүлэр, билиҥҥи кэм ирдэбилинэн, резюме суруйарга сүбэ-ама ыллылар. Дьаарбаҥка түмүгүнэн 4 киһи үлэ булан, үөрэн-көтөн барда.
Дьаарбаҥка кэмигэр улуустааҕы Дьарыктаах буолуу кииниттэн бэйэ дьыалатын тэриммит дьон тэрийбит атыы-быыстапкаларын сылдьыбыт дьон улаханнык сэҥээрдилэр.
Улуустааҕы Дьарыктаах буолуу киинэ.
