Бу күннэргэ Э.К.Пекарскай аатынан Игидэй орто оскуолатыгар Чурапчы улууһун Д.П.Коркин аатынан Чурапчытааҕы спортивнай оскуола педколлективыттан 26 учуутал уонна оскуола салалтата кэлэн, ыалдьыттаан барда. Кинилэр Игидэй орто оскуолатыгар быйылгы үөрэхтээһин сылыгар киирбит саҥа "ГЛОЛАЙМ-Школа" систематынан оскуола буфетыгар оҕолору хайдах аһаталларын, прототипированиеҕа уонна ментальнай математикаҕа оҕолору хайдах үөрэтэллэрин көрөөрү кэлбиттэр. Оскуола библиотекатыгар көрсүһүү кэннэ аһаҕас уруоктарга сырыттылар. Оскуолабытыгар "Сындыыс" хайыһар куруһуога (сал. С.Е.Оросин) кэнники үс сылга ситиһиилээхтик үлэлиир. Софрон Егорович куруһуогун үлэтин билиһиннэрбитин сэҥээрэн иһиттилэр.
Көрсүһүүгэ оскуолабыт директора В.В.Лопатин бу курдук кэпсээтэ: "Кэлэр үөрэх дьылыгар оскуолабыт 100 сааһын бэлиэтээри олоробут. 1917 сыллаахха Күндү диэн алааска Игидэй нэһилиэгэр бастакы үөрэх кыһата аһыллыбыта. Ол кэмтэн ыла оскуолабытыгар үгүс көлүөнэ ыччат үөрэх-билии сырдык аартыгын арыйан ааста. Оскуолабыт баай историялаах. Ол историятын түмэн кинигэ оҥоро сылдьабыт. Бастакы "Сырдык санаа кыһата" диэн кинигэ 2007 сыллаахха бэчээттэнэн тахсыбыта. Аны күһүн үбүлүөйү көрсө иккис кинигэбит тахсыахтаах.
Оскуолабыт иитэр-үөрэтэр үлэни хас да хайысханан ыытар. Игидэй сирэ төрөөбүт тыл тылдьыта үөскээн тахсыбыт сирэ буолан, төрөөбүт тылга үлэлэһэбит. Сылын аайы ыытыллар "Куолу" диэн аман өс курдук араатардьыттар күрэстэрин ыытабыт, ахсаан өттүгэр математикаҕа ментальнай математика диэни саҕалаатыбыт, спорка хайыһар күрэхтэһиитин ыытабыт. Ааспыт нэдиэлэҕэ улахан сөбүлэҥ боппуруоһугар кэпсэтиигэ киирэ сырыттыбыт. Хайыһарга улахан республикатааҕы күрэхтэһиини ыытар буоллубут. Биһиги хайыһарбыт суолун хайгыыллар. Олимпийскай суол диэн ааттыыллар. Хайыһар трассатын энтузиаст-педагог С.Е.Оросин бэйэтин күүстээх баҕатынан оҥорор. Онон ити үлэбит олус кэскиллээх буолла. Былырыын хаарынан манеж оҥорбуппут. Оҕолорбут ис дууһаларыттан баҕаран туран дьарыктаммыттара. Алдан куоратыгар сборга бара сылдьыбыттара. Оскуолабытыгар 127 оҕо үөрэнэр, 26 учуутал үлэлиир. Завучпут С.С.Пахомова хаһыс да сылын айымньылаахтык үлэлиир. Оскуолабыт 2015 сылтан аварийнай буолан үс объегынан олорон үлэлиибит. Усулуобуйабыт кыараҕас. Саас таас оскуолабыт сваята түһүөхтээх. Онон оскуола саҥа дьиэтэ тутулларыгар эрэл санаалаах сылдьабыт".
Чурапчы оскуолатын директора Николай Николаевич Гуляев: "Виктор Васильевич үөрэҕин бүтэрээт, үлэтин биһиги оскуолабытыттан саҕалаабыта. 2011-2013 сылларга бииргэ үлэлээбиппит. 400 миэстэлээх оскуола тутуллан үлэҕэ киирбитэ. Ол кэмнэргэ оскуола информатизациятыгар өҥөтө улахан дии саныыбын. Куоракка саҥа оскуолабыт тутуутун боппуруоһугар элбэхтэ бииргэ сылдьыспыта. Онон оскуола тутуутугар кырата суох уопуттаах. Уолгут туттарыаҕа, Чурапчы оскуолатын ааспыт киһи ол дьыаланы кыайыа диэн эрэнэбин. Оскуолабыт үбүлүөйэ буолан ааспыта. Ол бэлиэтэ, туоһута буолбут үлэбитин түмпүт кинигэлэрбитин, брошюраларбытын бэлэх уунабын. Виктор Васильевич директорынан анаммытыгар наһаа үөрбүтүм. Уонна бу икки оскуола үлэтигэр шефтэһэр үлэни ыытыаххайыҥ диэн этии киллэрэбин. Инникитин бииргэ үлэлэһиэҕиҥ".
Д.П.Коркин аатынан спортоскуола социальнай педагога Николай Николаевич Монастырев: "Мин нуучча тылын уруогар сырыттым. 10-с кылаастарга. Учуутал информационнай технологияны туттан, уруогун наһаа интэриэһинэйдик ыытта. Уруогар икки төгүл сыана туруорда уонна түмүгэр ону суумалаабытын сэҥээрэ көрдүм. Оҕо уруокка активнаһын үрдэтэр эбит. Тест толорторор. Уруогун БКЭ-ҕэ туһаайан ыытар эбит. Куолаан үөрэтии ньыматын туттар. Учуутал сыаната ыарахан, хаһан баҕарар. Оҕо бэйэтэ бэйэтин сыаналыы үөрэнэр дьоҕурун үрдэтэр. Итини хайҕаатым. Бэйэ-бэйэлэригэр сыһыаннара үчүгэй. Олус культуралаахтар. Онон иитии үлэтигэр болҕомто ууруллара көстөр".
Түмүккэ, Таатта улууһун Э.К.Пекарскай аатынан Игидэй орто оскуолатын уонна Чурапчы улууһун Д.П.Коркин аатынан Чурапчытааҕы спортивнай оскуола коллективтара хардарыта бииргэ сибээстэһэн үлэлииргэ дуогабар түһэристилэр.
Г.ПОПОВА,
педагог-библиотекарь.
