Баайаҕа нэhилиэгэр «Удьурҕайдар олоҥхолуу кэлэллэр үhү» диэн кэпсээн ыалтан ыалга тилийэ көппүтэ. Олоҥхону сэҥээрээччилэр ити солуну сэҥээрэ истибиттэрэ. Кулун тутар 3 күнүгэр кэтэhиилээх дьоро күн тиийэн кэллэ. Мустуохтаах ыалбыт Тимофеевтар алаhа дьиэлэрин аанын аhан, олоҥхо эйгэтигэр киирдибит. Олоҥхоhуттар кэлэн, таҥастарын кэтэн, ыллыырга-туойарга бэлэм олороллор.
Хаhан баҕарар олоҥхоhут кимтэн кииннээҕин, хантан хааннааҕын истээччи биэс тарбах курдук билээччи.
«Удьурҕайдар» ааттаах-суоллаах этно–бөлөх буолаллар, алтыс сылын норуот тылынан уус-уран айымньытын – олоҥхону дьон-сэргэ ортотугар пропагандалыыр, тарҕатар, сайыннарар сыаллаахтар-соруктаахтар.
Баайаҕалар күндү ыалдьыттарынан Маркова Раиса Семеновна, Санникова Зоя Лукинична-Үчүгэй, Цой Людмила Константиновна буоллулар. Бары да туппуттарын ыhыктыбат, тэппиттэрин кубулуппат сүрүннээх Далбар Хотуттар эбит.
«Удьурҕайдар» Таатта өҥ кырсыттан силис тардан, республика улуустарыгар бөлөхтөрү тэрийэн, ыырын кэҥэтэн иhэрэ кэрэхсэбиллээх. Уус Алдаҥҥа «Удьурҕай – Тулуна», Дьокуускайга «Алаhа – Удьурҕай», «Дьоҕур – Удьурҕай» этно-бөлөхтөр тэриллибиттэр, 60-ча олоҥхону толорооччуну түмэр бөлөх буолбут.
Маргарита ЕГОРОВА.
