«Килиэп – барыга төбө» диэн нуучча өс хоһоонунуу, нэһилиэккэ килиэп атыыланар буоллаҕына үлэ-хамнас өссө таһаарыылаахтык барар. Үлэһит киһи бүгүн килиэппин хантан ылабын, тугу астанабын диэн дьиэ кэргэн тыын боппуруоһунан үүйэ-хаайа тутуммат буолар.
Быйыл Даайа Аммаҕа Хрисанф Хрисанфович Кашкин килиэп астаан атыылаабыта төрдүс сылыгар барбыт. Бу иннинэ кини Чөркөөххө, Тыараһаҕа килиэп астаабыта. Чөркөөх бэкээринэтигэр Кириһээн 1988 – 2005 сылларга таһаарыылаахтык үлэлээбитэ. Онон кини минньигэс килиэбин олохтоохтор билигин да ахталлар, саныыллар.
- Күҥҥэ 45 – 50 килиэби, 15 – 12 саайканы астыыбын, - диэн кэпсиир Кириһээн Кириһээнэбис. Салгыы кини: «Бурдукпутун «Якутторг» тэрилтэттэн кууһунан ылан кэбиспиппит. Ый аайы кредит быһыытынан төлүүбүт, ол биллэн туран, үлэлииргэ табыгастаах. Даайа Амматын курдук тэйиччи сытар, бүөм сиргэ, күһүн, саас суол-иис хаайтарыытын кэмигэр маннык кууһунан ылар табыгастаах. Онон тыын суолталаах бурдук боппуруоһунан хааччыллыыга абыранныбыт. Бу бэкээринэни чааһынай предприниматель С.С.Винокуров үлэлэтэр. Бэйэм бу бэкээринэм иккис мэндиэмэнигэр олоробун. Дьоҕус нэһилиэк буолан өрөбүлэ суох күн аайы үлэлиибин. Сайын аҕыйах хонукка уоппуска ылан дьиэ кэргэммэр Дьокуускай куоракка баран кэлэбин.
Ити курдук үлэһит дьонноох-сэргэлээх Даайа Амма олохтоохторун сандалыларыгар күннэтэ Кириһээн Кириһээнэбис минньигэс килиэбэ хотойорунан ууруллар. Кини астыыр, дьонно-сэргэҕэ оҥорор өҥөтө кырыы нэһилиэк биир улахан суолталаах боппуруоһун быһаарар.
С.ХАЛГАЕВА.
