Кубулҕаттаах кулун тутар ый кубулҕатырар кэмигэр, күүстээх ириэриилэр буолбут күннэригэр, ууну-хаары бидиличчи кэстэрэн, Майа сэлиэнньэтигэр күрэхтэһэн кэллибит. Онно «СӨ ОДьКХ» ГУТ илин эҥэринээҕи филиалларын ХVII Спартакиадата тэрилиннэ. Барыта алта филиалтан 300-кэ спортсмен мустан, спорт 9 көрүҥҥэ иэмэх мастыы эристибит. Элбэх үлэһиттээх олохтоохтор инники күөҥҥэ сырыттылар. Онтон иккис-үһүс миэстэлэр иһин хабыр хапсыһыылар буоллулар. Хамаандалары барыларын чугастааҕы нэһилиэктэргэ түһэрдилэр. Биһигини Майаттан үс биэрэстэлээх Чүүйэ таас оскуолатыгар олохтоотулар. Спортивнай саалаҕа утуйдубут, остолобуойугар аһаатыбыт. Туох да ааттаах буолуоҕун, сибээс, уот сотору-сотору барыыта эрэйдээтэ. Ватсабынан эрэ баар балаһыанньаны билсэ олордубут.
Тиийбит күммүтүгэр мандат, ыйааһын буолла. Иккис күн түөрт көрүҥ түмүктэннэ. Үс иһигэр киирдэрбит диэбит гиревиктэр, хамаанданан бастакы миэстэни ыланнар соһуттулар. Биирдиилээн ыйааһыннарга 70 кг Стас Белолюбскай, 80 кг үөһээ Владимир Колесов бастакы, 63 кг Семен Сатаркин, бэтэрээннэргэ 70 кг үөһээ Алексей Налыяхов (Чычымах) иккис миэстэлэри ыланнар, хамаанда бастыырыгар олук уурдулар. Остуол тенниһигэр биһиэннэрэ бастаабыт Аммалары 3:0 кыайан баран, хардарыта хотуһуу түмүгэр иккис миэстэҕэ таҕыстылар. Бастакы ракеткаҕа Николай Новгородов үһүс, дьахталларга Вилюяна Павлова бастакы миэстэлэннилэр. Ытыыга уолаттар табыллан ыппатылар, онон төрдүскэ үтүрүлүннүбүт. Урут бастааннар Кубок аҕалан тураллар. Кэрэ аҥаардарга Яна Иванова 221 очукуону (уопсайынан төрдүс көрдөрүү) аахсан, Спартакиада элбэх төгүллээх чөмпүйүөнэ буолла.
Күрэхтэһиилэр волейболтан уратылара бары Манчаары аатынан спортивнай комплекска буолбуттара. Бастакы күн элбэх көрөөччүнү хапсаҕай тустуу тарта. Хамаандалар тустар кылаастарынан сыл аайы тэҥилэһэн иһэллэр. Араас сылларга Мэҥэ Хаҥалас, Чурапчы, Томпо, Уус Алдан хапсаҕайдьыттара бастаан тураллар. Кэлин сылларга хамаандалар сирэй сирэйгэ (стенка на стенку) киирсэр буолуохтарыттан, хапсыһыылар наһаа хатыһыылаах интэриэһинэй буоллулар. Сэттэ ыйааһынтан түөрдүн ылбыт хамаанда кыайар. Биһиэннэрэ Томполору, Чурапчылары 5:2 ахсаанынан кыайталаан баран, Аммаларга, Уус Алданнарга бэрт кыранан 3:4 кыайтартааннар, төрдүс буолан хааллылар. Иккиттэн биирин кыайбыттара буоллар үһүскэ олоруо эбиттэр. Биирдиилээн ыйааһыннарга 58 кг Николай Доргуев иккис, 64 кг спорт маастара Ариан Васильев бастакы, 70 кг Иннокентий Макаров үһүс миэстэлэри ыллылар. Манна бэтэрээннэргэ 70 кг үөһээ Иван Попов сэргэх тустууну көрдөрдө, үстэ кыайан баран кыһыылаахтык хаачыстыбанан төрдүс буолан хаалла. Кини Саха сирин чөмпүйүөнүн, спорт маастара Николай Баттаховы суулларбытын хайаан да бэлиэтиэххэ наада.
Иккис күн сарсыардаттан мас тардыһыыта сүрдээх сытыытык барда. Абытай хаһыылаах-ыһыылаах киирсиилэр манна буоллулар. Уопсай түмүгү таһаарыыга Таатта, Чурапчы, Уус Алдан, Амма олох чугас-чугас сылдьар буоланнар, дьэ абытай хапсыһыылар буоллулар. Таатта хамаандата Томполору, Аммалары, Уус Алданнары кыайа тутан үһүс миэстэлэннэ уонна уопсай түмүккэ иккис миэстэҕэ тахсарбытыгар (мас бүтэһик бүппүтэ) олук буолла. Масчыттар биэс мэтээлгэ тигистилэр: 58 кг Николай Сенькин үрүҥ көмүс, 70 кг спорт маастара Модест Баишев (Уолба) кыһыл көмүс, 80 кг Тимофей Охотин (Дьохсоҕон) боруонса, бэтэрээннэргэ 70 кг дылы спорт маастара Семен Хатылаев боруонса, 70 кг үөһээ Дмитрий Попов (Дьохсоҕон) үрүҥ көмүс мэтээллэри аҕаллылар.
Саахыматчыттар былырыыҥҥыларын курдук иккис миэстэлэннилэр. Ол оннугар мэтээллэрэ икки буолла, былырыын түөрт этэ. Бастакы дуоскаҕа былырыыҥҥы ситиһиитин чиҥэтэн Софрон Товаров-2 эмиэ үһүс миэстэлэннэ. Дьахталларга Александра Кириллина чөмпүйүөннээтэ. Дуобакка Бороҕоҥҥо бастаабыппыт, онтон быйыл биир бастыҥ оонньооччубут барбакка, Мэҥэ Хаҥалас, Чурапчы күүстээх хамаандаларын кэнниттэн, үһүс буолан хааллыбыт. Дуоскаларынан маастарга кандидаттар Анатолий Мурунов иккис, Семен Варламов иккис, Пантелеймон Сенькин үһүс миэстэлэри ыллылар. Филиал дириэктэрдэрэ туһунан уксааҥҥа кииристилэр. Онуоха кыайыылааҕынан биир дойдулаахпыт, Чурапчы филиалын дириэктэрэ Георгий Александров таҕыста. Биһиги дириэктэрбит Дмитрий Павлов төрдүс миэстэ буолла. Волейболистар саҥа таас оскуола саалатыгар оонньоотулар. Быйыл оонньуулара хайдах эрэ тахсыбата. Чурапчылары, Томполору кыайталаан бараннар, бастаабыт Амма хамаандатын кытта олох тэҥ киирсиигэ, 2:1 ахсаанынан сабырыттарбыттара. Онтон салгыы иккитэ хоттороннор, төрдүскэ хааллылар. Бу иннинэ үс бастыҥ хамаанда иһигэр киирэ сылдьыбыттара.
Тоҕус көрүҥ түмүгүнэн Мэҥэ Хаҥалас хамаандата холкутук бастаата уонна көһөрүллэ сылдьар улахан Кубогы Манчаары дойдутугар хааллардылар. 27 очукуолаах Таатта иккис, 29 очукуолаах Чурапчы үһүс миэстэлэргэ таҕыстылар. Иллэрээ сыл бастаабыт Аммалар төрдүс, былырыын бастаабыт Уус Алданнар бэһис, Томполор алтыс буоллулар. Биһиги хамаандабыт былырыын биэс көрүҥҥэ миэстэлэһэн баран (ол иһигэр дуобакка бастаабыппыт), бэрт кыранан хаалан төрдүс миэстэлэммиппит. Ол иһин быйыл сүрдээх тэрээһиннээхтик киирсэн, иккис миэстэҕэ тахсаммыт улаханнык үөрдүбүт. Эрдэттэн хамаанданы таба аттардахха, күүскэ бэлэмнэннэххэ, бастакы да миэстэ иһин киирсиэххэ сөп эбит диэн, өйдөбүллээх кэллибит. Филиал хамаандатын профком бэрэссэдээтэлэ Варвара Федосеева, кылаабынай инженер Владимир Колесов салайан илдьэ сырыттылар. Эһиилги ХVIII Спартакиада Амма улууһугар ыытыллыаҕа.
Анатолий МУРУНОВ,
хамаанда хапытаана.
