1-й Маай дойду үрдүнэн ньиргиэрдээхтик, өрө көтөҕүллүү быһыытыгар-майгытыгар ааста. Биһиги улууспут олохтоохторо дойду бүттүүнүн кытта биир сомоҕо буоларын көрдөрөн, 1-й Маай бырааһынньыгын үрдүк тэрээһиннээхтик бэлиэтээн аастылар. Улуус киинигэр бырааһынньык Киинэ, Тупсаҕайдык туттан олоруу, Үөрэхтээһин уонна Таатта нэһилиэгэ тэриллибитэ 100 сылларыгар ананан ыытылынна. Ытык Күөл киин уулуссатынан, улуус дьаһалтатын дьиэтин иннинэн тэрилтэлэр бииртэн биир тупсаҕайдык симэммит колонналара күргүөмүнэн, «Ураа!» хаһыы доҕуһуолунан ньиргитэн аастылар.
Бырааһынньыкка мустубут дьону бастакынан улуус баһылыга М.М.Соров эҕэрдэлээтэ, кылгастык улуус сайдыытын билиҥҥи балаһыанньатын, инники кэскилин билиһиннэрдэ уонна бу күннэргэ СӨ Ил Дархана Е.А.Борисов 2018 сылга П.А.Ойуунускай төрөөбүтэ 120 сылын туолар үбүлүөйэ бэлиэтэнэринэн республикатааҕы хамыыһыйаны тэрийбитин, онон улуу киһибит үбүлүөйүн көрсө тэрээһин үлэ саҕаламмытын туһунан үөрүүлээх сураҕы иһитиннэрдэ. Ол кэнниттэн үлэ бастыҥнарыгар наҕараадалары туттарда. Бу үөрүүлээх күн «Сулусчаан» оҕону сайыннарар киин сэбиэдиссэйэ Е.Т.Алексеева РФ Үөрэххэ уонна наукаҕа министерствотын Бочуотунай грамотатын, государственнай тэрилтэлэр үлэһиттэрин профсоюзтарын улускомун бэрэссэдээтэлэ М.Л.Архипов «Саха Өрөспүүбүлүкэтин социальнай сулууспаҕа туйгуна» бэлиэни, Ытык Күөллээҕи 1-кы №-дээх баһаарынай чаас начальнига А.А.Большаков РФ Ыксаллаах быһыыга-майгыга министерствотын бирикээһинэн Россияҕа баһаары утары охсуһар сулууспа тэриллибитэ 367 сылынан «В память о восстановлении города Ленска» өйдөбүнньүк мэтээли туттулар. Оттон улуустааҕы 32-с №-дээх баһаары утары охсуһар этэрээт начальнигын солбуйааччы И.Ф.Рахлеев СӨ Бырабыыталыстыбата ыыппыт куонкурсугар көхтөөхтүк кыттан, «Баһаартан сэрэхтээх буолуу бастыҥ пропагандиһа» номинациянан наҕараадаланна. Улуус социальнай-экономическай сайдыытыгар кылаатын иһин үлэ, тыыл бэтэрээнэ А.Г.Охотина улуус бочуоттаах гражданинын аата иҥэриллибитин туоһулуур бэлиэни тутта.
Быйыл Таатта нэһилиэгэ тэриллибитэ 100 сыла бэлиэтэниэҕэ. Онон нэһилиэк баһылыга Е.И.Павлов мустубут дьону 1-й Маайынан эҕэрдэлээн туран, быйылгы үбүлүөйдээх сылы үрдүк тэрээһиннээх үлэнэн бэлиэтииргэ, сэлиэнньэни тупсарыыга, көҕөрдүү үлэтигэр көхтөөхтүк кыттарга ыҥырда. Ити курдук бу үөрүүлээх бырааһынньыгынан нэһилиэк олохтоохторун улуус депутаттарын Сэбиэтин бэрэссэдээтэлэ В.А.Охотин, Таатта нэһилиэгин депутаттарын Сэбиэтин бэрэссэдээтэлэ А.И.Шарин эҕэрдэлээтилэр. Профсоюзтар ааттарыттан тыл эппит М.Л.Архипов быйылгы 1-й Маайдааҕы демонстрациялар сүрүн экономическай туруорсууларынан хамнаһы уонна пенсияны үрдэтии буоларын бэлиэтээн туран, мустубут дьону биир сомоҕо буола түмсэргэ ыҥырда, үлэҕэ-хамнаска үрдүк ситиһиилэри баҕарда.
Ити кэнниттэн бырааһынньык үөрүүтүн улуус киинин уус-уран самодеятельноһын кыттыылаахтарын уонна культура управлениетын үлэһиттэрин күүһүнэн бырааһынньыктааҕы кэнсиэр салҕаата. Быйылгы парад Таатта нэһилиэгэ тэриллибитэ 100 сылыгар ананан ыытылларынан нэһилиэк дьаһалтата колонналары киэргэтиигэ куонкурус биллэрбитэ. Түмүккэ, Ытык Күөл 1-кы №-дээх оскуолатын коллектива бастакы миэстэҕэ таҕыста, иккиһи улуустааҕы үп-хааһына управлениетын, үсүһү РЭС коллективтара ыллылар.
Н.ИОВЛЕВ.
