Уолбаҕа
Иккис күн тыа хаhаайыстыбатын министрэ А.Е.Артемьев баhылыктаах отчуоттуур биригээдэ Уолбаҕа саҥа сүөhү иитэр комплекс аhыллыытыгар сылдьан баран, саҥа тутуллан үлэҕэ киирээри турар КСК-ҕа нэhилиэнньэни кытта көрсөн, ааспыт сыллааҕы үлэ отчуотун иhитиннэрдэ. Отчуот сүнньүнэн бастакынан ааспыт сыллааҕы отчуот кэмигэр киирбит этиилэр хайдах туолбуттарын туhунан ыйыттылар. Онуоха квартальнай котельнай тутуута 2018 с. былааҥҥа баарын, ол гынан баран булгуччу тутуллар диэн этэр кыах суоҕун, ФАП-ну государство уонна чааhынай инвестор үптэрин суотугар тутуохтаахтарын, ол гынан баран балыыhа үлэҕэ киирдэҕинэ 5 сыл устата арендаҕа бэриллэрин, ол аренда ыйдааҕы төлөбүрүн кээмэйэ 330 тыh.солк. тэҥнэhэрин, онон боппуруос кэккэ уустуктардааҕын, ол да буоллар тутааччы акылаатын маhын бэлэмнии сылдьарын, дьиэ сэндвич-панелынан тутуллуохтааҕын, КСК тутуллан бүтэн үлэҕэ киирээри турарын, ТХМ оскуола-садтары тутар программата тохтообутун, онон оскуола тутуута өрэх министерствотын нөҥүө, улууска баар уочарат бэрээдэгинэн тутуллуон сөбүн, Уолба күөлүн дамбатын тутуутугар үлэ салгыы барарын, Хамынньыкы үрэххэ ыытыллыахтаах үлэ былааҥҥа баарын, культура сүнньүнэн киирбит этиилэр туолбуттарын туhунан иhитиннэрдилэр.
Ытык Күөлгэ
Улуус киинигэр отчуоту тыа хаhаайыстыбатын министрэ А.Е.Артемьев туруорда. Кини кэнниттэн эhилиэктэринэн сылдьыбыт биригээдэлэр салайааччылара сылдьыбыт сирдэринэн ким, тугу туруорсубутун билиhиннэрдилэр. Ол кэнниттэн Ил Түмэн депутаттара И.М.Андросов, П.П.Пинигин кылгастык депутат быhыытынан ааспыт сыллаахха тугу үлэлээбиттэрин билиhиннэрдилэр.
Отчуот сүнньүнэн нэhилиэк олохтооҕо Д.Д.Петров министртэн бааhына иэнигэр субсидияны биэрии тоҕо 300 гектарынан хааччахтанарын, бу ыhыынан дьарыктанар баҕалаах дьону күөмчүлээhин буоларын бэлиэтээн туран, тоҕо оннугун ыйыталаста. Министр күөмчүлээhин диэн этиини улаханнык сөбүлээбэтэ эрээри 300 гектартан кыра сиргэ ыhар хаhаайыстыба көдьүүhү ылбатын, Тааттаҕа «Уолба» эрэ кооператив ити иэҥҥэ эппиэттэhэр бааhынаҕа ыhыы ыhарын, Амма улууhа республика ыhыытын аҥаарын ыhа олорорун, ханнык да күөмчүлээhин суоҕун быhааран эттэ.
Н.ИОВЛЕВ.
