Уһук ыраах сытар кэрэ айылҕалаах Даайа Амматын нэһилиэгэр кулун тутар 20 күнүгэр «Дайыы» туристическай комплекс аһыллыыта буолан үлэтин саҕалаата. Бу турбазаны бастаан оскуола аһан үлэлэппитэ уонча сыл буолла. Билигин Прокопий Афанасьевич Моттуев салалтатынан бу туристическай комплексы быйылгыттан саҕалаан оскуоланы кытта кыттыһан үлэлэтэн эрэр.
- Прокопий Афанасьевич, бу туристическай комплекс төһө кэмҥэ диэри үлэлиирий?
- «Дайыы» туристическай комплексын каникул бүтүөр диэри үлэлэтиэхпит. Былырыын эрдэ ириэрэн кэбиһэн тохтообуппут. Халлааммыт маннык өссө да тура түһэрэ буоллар дии саныыбын.
- Төһө элбэх дьон-сэргэ кэлэн сынньанан баралларый?
- Билигин суол баар буолан ыаллыы олорор улуустар Томполор, Чурапчылар, атын да улуустар кэлэн, сынньанан, оонньоон-көрүлээн бараллар. Бэйэбит да улууспут атын нэһилиэктэриттэн кэлэллэр.
- Аттракционнар ханнык араастара үлэлииллэрий, билиэтин сыаната төһө буоларый?
- Манна сыыртан сырылыыллар, лабириҥҥа сылдьаллар, карусельга, квадрациклынан, буранынан, атынан хатааһылыыллар. Лазертаг баар, улахан шарынан үөһэттэн төкүнүйэн түһэллэр. Бу туристическай комплекска киирии билиэт улахан дьоҥҥо 150 солкуобай, оҕолорго 100 солкуобай. Оттон аттракционнарга туһунан төлүүллэр, сыаната араас буолар. Остолобуойу «Ийэлэр сүбэлэрэ» түмсүү үлэлэтэр уонна каникул кэмигэр оскуолалар үлэлэтиэхтээхтэр. Өссө «Тэйэр Хайаҕа» баран үөһэ тахсаллар. Онно үөһэттэн айылҕа көстүүтэ олус кэрэ буолар. Бу хайаҕа тахсалларыгар баҕа санааларын санаан баран таҕыстахтарына, ол санаабыт баҕа санаалара хайаан да туолар диэн итэҕэл баар.
- Прокопий Афанасьевич, кэпсээниҥ иһин махтал. Өссө да ситиһиилээхтик уонна ай-ымньылаахтык үлэлииргэр баҕарабын.
Салгыы карусельга оҕолору хатааһылата сылдьар Афанасий Тихонович Степановка тиийдим.
- Афанасий Тихонович, бу карусельгытын хайдах, кимнээх оҥорбуттарай?
- Мин ОДЬКХ-ҕа сварщиктыыбын, бу каруселы «Аҕа сүбэтин» түмсүүтүн кытта кыттыһан оҥорон үлэлэппиппит алта сыл буолла. Редукторын Ытык Күөлтэн булбуппут, оттон олорор олбохторун комбайнтан уонна эргэ кулууп олоппосторуттан хомуйан оҥорбуппут. Карусельбыт электрическай уотунан үлэлиир. 50 солкуобайга 5 мүнүүтэ устата дьон сүрдээҕин сөбүлээн хатааһылыыллар.
Бэйэбит инф.
