Тохсунньу 31 күнүгэр улуус киинигэр Тааттатааҕы народнай театрга Россияҕа экология, Саха Өрөспүүбүлүкэтигэр Ыччат, Таатта улууһугар дьиэ кэргэн уонна ыччат сылларын үөрүүлээхтик аһыы тэрээһинэ үрдүк таһымнаахтык ыытылынна.
Бу күн сарсыарда өттүгэр бырайыактар, ыытыллыбыт үлэлэр, норуот маастардарын, фотографтар, үөрэҕирии эйгэтин үлэлэрин быыстапкалара киэҥ ис хоһоонноохтук тэрилиннилэр. Сыллары үөрүүлээхтик аһыыга «Таатта улууһа» МО баһылыга М.М.Соров сыллар хайа да хайысхаҕа ыытыллыылара ааспыт сылларга үлэлэммити ырытан, анааран көрөргө уонна саҥа соруктары туруорарга, олоххо киллэрэргэ туһаайыллалларын, урукку да өттүгэр итинтэн сиэттэрэн үгүс өттүгэр сайдыыга тахсыы куруутун баарын чопчулаан эттэ. 2017 сылга туһаайыллыбыт сыллартан билигин дойду үрдүнэн барыбытын долгутар айылҕаҕа харыстабыллаах сыһыан мөлтөөбүтүн туоратыыга ыытыллыахтаах үлэлэр, өрөспүүбүлүкэҕэ ыччат идэ ылар үөрэҕэр кыһамньылаахтык үөрэнэн, үрдүк квалификациялаах специалист буолан тахсарыгар, общественнай үлэлэргэ, хамсааһыннарга актыыбынайдык кыттан дэгиттэр сайдыылаах буолалларыгар, урукку өттүгэр нэһилиэктэрин, улуустарын, өрөспүүбүлүкэни сайыннарыыга сүдү кылааттарын киллэрсибит дьиэ кэргэттэр ахсааннара элбииригэр дириҥ ис хоһоонноох үлэ ыытылларыгар бигэ эрэллээҕин дохсун ытыс тыаһынан иһитиннэрдэ.
Улуус баһылыгын солбуйааччылар И.А.Сивцева дьиэ кэргэн сылыгар кэскиллээх тэрээһиннэр, А.И.Попов улууска экологическай хамсааһыннар өссө киэҥник ыытыллыахтаахтарын сиһилии билиһиннэрдилэр. Улууспут ыччаттара бүгүҥҥү тэрээһиҥҥэ олоххо актыыбынай позициялаахтарын, инникитин түмсүүлээх буолуохтарыгар эрэллээх үөрүү күнүн бар дьонноругар бэлэх ууннулар. Улуус ыччат уонна дьиэ кэргэн политикаларыгар салалтатын эдэр салайааччыта К.Л.Егоров биир саастыылаахтарыгар, ытыктыыр аҕа саастаах дьонугар бастакы улахан этиитин үөрүүлээх быһыыга-майгыга эппитин бары астына истэн дохсун ытыс тыаһынан махталбытын биллэрдибит. Таатта ыччаттарын эҕэрдэлии, инники үлэни торумнаһа СӨ ыччат уонна дьиэ кэргэн политикатын министиэристибэтин ыччат политикатын салайыы уонна сабаҕалааһын салаатын салайааччыта, Чымынаайыттан төрүттээх биир дойдулаахпыт, И.П.Жегусов аатынан гимназия выпускнига Василий Алексеевич Данилов ыччакка аналлаах Дьокуускайга ыытыллыахтаах Бүтүн Россиятааҕы улахан тэрээһиннэргэ, улуус иһигэр киэҥ өрүттээх үлэни ыытыыга Таатта ыччаттара инники күөҥҥэ сылдьалларыгар эрэллээҕин биллэрдэ. Министиэристибэттэн грамоталары уонна хайҕал суруктары киэн туттар ыччаттарбыт Д.Д.Апросимов Баайаҕаттан, А.А.Осипова Уус Тааттаттан, П.С.Доргуев улуустааҕы баһаарынай чаастан, Г.Г.Нестеров Чымынаайыттан, Е.С.Протопопова СӨ психологическай киинин психолога, о.д.а. ылан салгыы µлэлииллэригэр тирэҕирдилэр.
Ыччаттарбыт быйылгыттан өссө күүскэ үлэлииллэригэр ХИФУ устудьуоннарын профсойууһун «ВиНиЛ» добровольческай сойууһун киинин салайааччыта, эбии үөрэхтээһин педагога М.Г.Гуринов, «Россия устудьуоннарын этэрээттэрэ» Саха сиринээҕи салаатын үлэ биэрээччилэри кытта үлэ испэсэлииһэ А.С.Соломонов кэлэн сүбэлээн, көмөлөһөн бардылар.
Сыллар үөрүүлээхтик аһыллыыларын культура уонна духовнай сайдыы улуустааҕы салалтатын уус-уран салайааччыта М.Н.Федорова салалтатынан ыччаттар истиҥник-иһирэхтик салайан ыыттылар. Тэрээһиҥҥэ бэйэлэрин ырыаларынан Тыараһаттан, Уолбаттан, Ытык Күөлтэн «Икки сулус-2017» улуустааҕы ырыа куонкуруһун кыайыылаахтара, талааннаах ырыаһыттар, дьахталлар «Алдаана» вокальнай ансаамбыллара эҕэрдэлээтилэр.
Онон, Таатта улууһугар 2017 сылтан ыччаттарбыт өссө түмсэн, айылҕа харыстабылыгар «ЭКО-ситим» экологтар түмсүүлэрэ, дьиэ кэргэттэр олохторун оҕо иитиитигэр, хаһаайыстыбаны тэриниигэ, дьиэни-уоту тупсарыыга, тус бэйэни таһынан тулалыыр дьону түмэн уйгулаах, интэриэһинэй олохтоох буолан, улуус сайдыы саҥа таһымыгар тахсарыгар сүдү кылааттарын киллэрсиэхтэрэ диэн эрэллээхпит.
В.ВИНОКУРОВ.
