Саҥа дьыл алыптаах, дьикти иэйиилээх түгэннэрин оҕо-аймах эрэ билинэр буолбатах, улахан уонна аҕам саастаах дьоҥҥо эмиэ ураты бэлэхтэри утары уунан соһутар.
Ол курдук, бу сыл бастакы күнүгэр Дьохсоҕоҥҥо саҥа үлэҕэ киирбит А.И.Софронов-Алампа аатынан норуот айымньытын дьиэтигэр саҥа дьыллааҕы улахан лотереяҕа олохтоохтору эрэ буолбакка, атын нэһилиэктэри кытары үмүрү тарта. Лотерея улахан сүрүн бирииһинэн УАЗ-микроавтобус туруоруллубута. Бу улахан бирииһи Дьохсоҕон эдэр ыччата, Аллара Бэстээх тимир суолун техникумун бастакы курсун студена Ньургун Дуракинов тутан үөрүүтэ муҥура суох буолла. Иккис сүрүн бирииһи – холодильник-лаары Дьохсоҕон орто оскуолатын 9 кылааһын үөрэнээччитэ Агаша Охлопкова сүүйэн ылан дьонун-сэргэтин үөртэ.
Саҥа дьыллааҕы сынньалаҥнарга Чөркөөххө ыытыллыбыт лотереяҕа нэһилиэк туруорбут супер-бирииһэ – дьиэни толору хааччыллыылаах оҥостуу иһин 100% үбүлээһин сертификатын Сунтаартан кэлбит эдэркээн кийиит Сардаана Ефремова сүүйэн үөрүүтэ үрдэ суох буолла. Эдэр ыал алаһа дьиэ тутталларыгар бастакы боччум хардыыны оҥордулар.
Онтон Баайаҕаҕа буолбут саҥа дьыллааҕы лотерея саамай муҥур бирииһин - Судзуки-альто массыынаны Владик Бурнашов сүүйэн соһуйда, долгуйда даҕаны! Владик Төҥүлү техникумугар бульдозерист идэтигэр үөрэнэр эбит, кини үлүскэн үөрүүтүн тапталлаах ийэтэ, Баайаҕа учаастактааҕы балыыһа үлэһитэ Марионелла Николаевна Бурнашова тэҥҥэ үллэстэр. Дьокуускайга Ороһооспо күн «Триумф» спорт комплексыгар ыытыллыбыт лотереяҕа норка саҕынньаҕы Баайаҕа олохтооҕо А.Н.Неустроева сүүйэн, этэргэ дылы, саҥа сылга бэртээхэй бэлэҕи тутта.
Онон Ыччат сылын бастакы күннэрэ – олохтоох эдэр ыччакка, чахчы да, бастакы өлгөм, соһуччу бэлэхтэринэн хадаҕалаата.
Бэйэбит инф.
