Улуус баһылыгын ыам ыйын 10 күнүнээҕи сүбэ мунньаҕа баһаар тула кэпсэтииттэн саҕаланна.
Тааттатааҕы СӨ баһаарынай быыһыыр сулууспатын Тааттатааҕы чааһын начальнига Д.Д.Дорофеев иһитиннэриититтэн билиһиннэрдэххэ, бары да көрө-билэ сылдьарбыт курдук, быйыл улахан баһаар улууска бэлиэтэнэ илик эрээри, сэрэтэр үлэ бэрээдэгинэн сиһилии кэпсээтэххэ хартыына этэҥҥэ. Ол курдук, бөһүөлэк иһиттэн саҕалаатахха, ыам ыйын 7 күнүгэр Тааттатааҕы үп-харчы тэрилтэтин гарааһын кырыыһата сибикилээһин бэрээдэгинэн уоту тардар ситимтэн, ыам ыйын 8 күнүгэр оҕо кииннэммит библиотекатын иһэ эмиэ сибикилээтэххэ уоту тардар ситим ууллубутуттан умайа сыспыттараб аһаарынай чаас байыастарын эппиэттээх үлэһиттэринэн умулларылынна. Ону таһынан киһи төбөтүгэр сатаан баппат быһыы-майгы эмиэ бэлиэтэннэ. Ол курдук, Ытык Күөлгэ эргэ бытовой дьиэни уонна ол аттыгар баар дьиэ аанын соруйан уоттуу сатаабыт киһи туоһу көмөтүнэн тутуллубут. Ыам ыйын 9 күнүгэр Чөркөөхтөн 1 килэмиэтир сиргэ бөлөх дьон айылҕаҕа сынньана диэн ааттаан тахсан баран тыа саҕатыгар уот оттон, 2 гаа кэриҥнээх оттуур сири умаппыттара баһаарынайдарынан умулларылынна. Көрүлээбит дьон эппиэттэн куотан астарын-үөллэрин хаалларан туран куоппуттар. Дьэ онон бу күннэргэ улуус үрдүнэн баһаарынай чаас байыастарынан былааннаах рейдэлэр ыытылла туралларын иһитиннэрэбит. Бэҕэһээ Ытык Күөлгэ айылҕаҕа күүлэйдии сылдьар 8 бөлөххө сэрэтии үлэтэ ыытыллыбыт.
Улуу Кыайыы 71 сылын бэлиэтээһин
Улуус баһылыгын социальнай боппуруостарга солбуйааччы Изабелла Сивцева Улуу Кыайыы күнэ кластер көмөтүнэн тэрээһиннээхтик ыытыллыбытын бэлиэтээтэ. Быйыл бүтүн Россиятааҕы акцияларга ("Полотно Победы", "Бессмертный полк", "Свеча памяти", "Вахта памяти") кыттыы, "Албан аат" орден толору кавалера Д.А.Петров аатыгар "Сулустаах чаас" Даккыга тиийэн от ыйыгар түмүллүөхтээҕин, Албан Аат музейыгар быйыл элбэх киһи сылдьыбытын бэлиэтээн туран, эһиил парад ыытыллар сирин уларытыы, тэрилтэлэри бырааһынньыкка кытыарыы былаанын курдук үлэлэри учуоттуохха диэн эттэ. Ыраастаныы үлэтэ "Таатта нэһилиэгэ" МТ баһылыга Егор Павлов тэрилтэлэр ыраастаналларыгар уонна бөҕү бэйэлэрэ тиэнэллэригэр сорудахтаата, параады эһиил пааркаҕа оҥоруохпут диэн быһаарыныыны иһитиннэрдэ.
Агрооскуолаларга
Улуус баһылыга Михаил Соров улууска үлэлиир 6 агрооскуолалары кытта дуогабар түһэрсиллибитинэн билигин хас биирдии оскуола 22 оҕо уһуйааннарыгар уонна оскуолалары этинэн, хортуосканан, хаппыыстанан хааччыйар соруктаахтарын эттэ. Оччотугар бу үлэҕэ сайынын үлэлээбит оҕолор 15 тыһыынча солкуобайтан итэҕэһэ суох хамнастаналлар, харчылара бюджекка көрүллүбүт, итиэннэ бу үлэҕэ научнай тирэхтээх буолуутугар тыа хаһаайыстыбатын Академиятын кытта Сөбүлэҥ түһэрсиллибитинэн анал үөрэхтээх специалистар кэлэн сүбэ-саргы буолуохтаахтар.
Биир кэлим ититиниигэ холбонуу
Ытык Күөлгэ Олимпийскай дэриэбинэҕэ быйыл элбэх ыал биир кэлим ититиниигэ холбоноругар олохтоохтортон эбии үбү хомуйуу уопсай суумматыттан 70 бырыһыанын уйуналлара быһаарыллыбыт. Госбюджет, улуус, нэһилиэк бюджетынан котельнай тутулунна. Оттон турба тардыныытын 30 бырыһыанын ОДЬКХ ГУТ уйунуохтаах.
Тыа хаһаайыстыбата
Улуустааҕы тыа хаһаайыстыбатын управлениетын начальнига Владимир Алексеев иһитиннэрбитинэн быйыл улууска 15 эдэр фермер балтараалыы мөлүйүөнү, дьиэ кэргэн фермер 5, дьиэ туттуутугар 20, тупсарыныыга 5 ыал анал программанан грант ылары ситиспиттэр. Уопсай суумма 97 мөлүйүөн 566 тыһыынча солкуобай, былырыыҥҥыны кытта тэҥнээтэххэ 16 мөлүйүөнүнэн элбэх. Саҥа саҕалааччы фер-
мердэр республикатааҕы куонкуруһугар балтараалыы мөлүйүөнү ылыыга хомойуох иһин Хара Алдан, Уус Таатта, Уолба, Туора Күөл, Баайаҕа кыттыыны ылбатахтар. Бу ситэтэ суох үлэ биир биричиинэтинэн баһылык Михаил Соров ааттаммыт нэһилиэктэр баһылыктара бу салааҕа үлэлэрэ мөлтөҕүн ыйда. Үүтү туттарыы бу кэмҥэ 475 тонна диэн буолла, ол былырыыҥҥы көрдөрүүгэ тэҥнээтэххэ 181 тоннанан элбэх.
Доруобуйа харыстабыла
Улуустааҕы кииннэммит балыыһа былырыыҥҥыттан ыла эдэр ыччаты анал медицина үөрэҕэр үөрэттэриигэ былааннаах үлэни ыытар. Улууска куонкурус тэрийэн, стипендиялаан Алдаҥҥа сестра, фельдшер үөрэҕэр оҕолор ситиһиилээхтик үөрэнэллэрин хааччыйар. Биир үчүгэй күүтүүлээх сонунунан куртаҕы көрөр аппараат ФГДС бэйэбитигэр кэлэрэ буолбут. Итиэннэ манна даҕатан ыалдьыбыт дьон үлэҕититтэн олорон электроннай уочаракка 41291 нүөмэргэ эрийэн талбыт бырааскытыгар суруйтарыаххытын сөбүн санатабыт.
Акция "Подари книгу"
Улуустааҕы кииннэммит библиотека директора Анна Билюкина бу күннэргэ "Подари книгу" акцияны ыытарын иһитиннэрэр. Усулуобуйатын эбии билиһиннэриэхпит. Бу акция тустаах библиотекаҕа баһаар баран, сорох кинигэ умайан, сороҕо ууттан эмсэҕэлээн туһаттан тахсыбытынан ыытыллар. Библиотека үлэһиттэрэ тэрилтэлэри, чааһынай ыаллары бу акцияҕа актыыбынайдык кыттыахтара диэн эрэлин биллэрэр.
Анна ПОСЕЛЬСКАЯ.
