Бу сыл тохсунньу 4 күнүгэр Ытык Күөлгэ олорор "Уран тыл" литературнай түмсүү кэпсэтии, айымньыны ааҕыы түһүлгэтигэр мустан ааспыт сыллааҕы үлэ түмүгүн, саҥа сыл былаанын оҥорууга санаа атастаһыыта көхтөөхтүк ыытылынна.
Түмсүү кыттыылаахтара үс хомуурунньукка айымньылара киирдилэр, сериябытыгар саҥа автордар эбилиннилэр, Республикатааҕы хоһоон айыытын куонкурсугар А.Р.Кулаковскай-Дьэҥкир Гран-прины ылар чиэскэ тиксибитэ.
"Үрдэл" национальнай бириэмийэҕэ И.А.Колодезникова-Ымыы, Н.И.Максимова-Сыралыма хоһоонноругар ырыалара киирдилэр. Түгэнинэн туһанан эҕэрдэбитин тиэрдэбит, ситиһии сиэттиһэ турарыгар баҕарабыт.
5 чыыһылаҕа быраас идэлээх И.Н.Макарова "Г.С.Неустроев - Алдан нэһилиэгин төрүттээччи" дириҥ ис хоһоонноох кинигэ биһирэмэр дьонун-сэргэтин муста.
6 чыыһылаҕа "Туллукчаан" оҕо библиотеката "Сарыал" кииҥҥэ литературнай харыйаны ыытан элбэх оҕо-аймаҕы үөртэ, билиигэ сирдээтэ.
9 чыыһылаҕа К.А., Т.А.Хатылыковалар "Олоххо эрэли өрө тутан" эдьиийдэрэ З.А.Хатылыкова туһунан кинигэтин биһирэмэ сэргэхтик буолла. Зинаида Анисимовна эдэркээн эрдэҕиттэн эрэйи эҥэринэн тэлэн, сырдыкка, кэрэҕэ тардыспыт, олоххо дьулуурун булгуруппатах, алтыспыт дьонугар истиҥ-сылаас өйдөбүлү хаалларбыта, күүрээннээх үлэтэ сиһилии кинигэҕэ арыллар.
Дьэ, бу курдук, өй-санаа эргийэр киинэ библиотека сылы көхтөөхтүк, инникигэ эрэллээхтик саҕалаата.
Светлана ИГНАТЬЕВА.
