Былыргы Ворошилов аатынан холкуостан төрүттээх дьон ыһыахтыыр сирдэрэ айылҕа саамай чэгиэн үүнээйилээх, кэрэ көстүүлээх сиригэр турар. Аттынан кырылас сүүрүктээх Таатта үрэх устан ааһар. Сирэ көбүс-көнө, күп-күөх кырыстаах кураанах ырааһыйа, эдэр хахыйахчааннар, титирикчээннэр тулалыыллар. Саас, күһүн сылаас кэмҥэ киһи эрэ тахсан сынньаныан, талбытынан таалалыан баҕарар күөх сирэмэ диэн манна баар.
Ол эрээри, хомойуох иһин, итиччэ айылҕа анаан айбыт күөх оттоох, көмүс ньээкэ кырыстаах үтүө сиригэр сынньанан, оонньоон-көрүлээн баран харыстаабаппыт, бөхпүтүн ыһан-тоҕон, киртитэн, сынньаммыппытын, астыммыппытын имири сотон барабыт. Тоҕо оннугуй? Кимнээх итинник дьаабыланаллара буолуой? Бэйэҕитин көрсөн ыйыппыт киһи баар ини! Санаан көрүҥ эрэ, арай бэйэҕит дьиэҕит иһигэр итиччэ бөх ыһылла сытарын... Оччоҕо баҕар туттунуоххут эбитэ дуу? Онон сиргэ-толооҥҥо сынньанан баран, бөхпүтүн-сахпытын тиэхникэбитигэр тиэнэн кэлэн, сыбаалкаҕа, помуойаҕа быраҕа үөрэниэҕиҥ эрэ. Ходуһаларбытын, кырдалларбытын ыраастык тутуоҕуҥ!
Ворошиловтар ыһыахтыыр сирдэрин Д.А.Петров аатынан Ытык Күөл 2-с №-дээх оскуолатын оҕолоро сылын ахсын ыраастыыллар. Онон саатар оҕолорбут сыраларын, үлэлэрин ытыктыаҕыҥ!
Даккы ААНА.
